Zaj nyeem hnub tim 22 lub 11 hlis 2023 (Daily reflection)

ZAJ NYEEM HNUB TIM 22 LUB 11 HLIS, HNUB NCO TXOG LEEJ NTSHIAB XES XIS LIAS
COV LUS NYOB HAUV LUS KAS NTAWV MOO ZOO (LK 19: 11-28)

Cov kwv tij Hmoob, Huab Tais Yes Xus twb tshaj lub Moo Zoo tau peb xyoos lawm, hnub no Huab Tais Yes Xus tuaj yuav txog lub tsheej Yes Lus Xas Les lawm tiag. Cov neeg raws Huab Tais Yes Xus, lawv puav leej ntseeg tias Huab Tais Yes Xus yog tus Mes Xias yuav tuaj tsa Tswv Ntuj lub Ceeb Tsheej, yog tus vaj yuav cawm sawv daws ntawm cov Los Mas txhais tes. Lawv xav tias Huab Tais Yes Xus mus pem Yes Lus Las Les zaum no mas lawv yuav tau txais kev twj lij raws li cov Yaj Saub tau xub hais ua ntej. Tab sis Huab Tais Yes Xus hais ib zag paj lug rau lawv tias ua ntej Tswv Ntuj lub Ceeb Tsheej yuav tawm los rau sawv daws pom, mas lawv sawv daws yuav tau muab siab rau leg cov hauj lwm Tswv Ntuj npaj tseg rau lawv ua kom txi txiv tso, lawv thiaj yuav pom tau Tswv Ntuj lub Ceeb Tsheej. Lawv yuav rau siab ua cov hauj lwm ntawd, txawm tias tas lub teb chaws yuav ntxub yuav tsis nyiam tus muab txoj hauj lwm rau lawv ua.
Cov kwv tij Hmoob, Huab Tais Yes Xus hais rau lawv tias muaj ib tug neeg nws yuav mus txais lub hwj chim vaj ntxwv, mas nws muab nyiaj rau cov tub txib coj mus ua luam kom txog hnub nws rov los, mas nws thiaj yuav tau cov peev thiab cov paj. 
Muaj ib hnub tus neeg rov los txog, nws hu sawv daws tuaj, ces sawv daws piav lawv cov hauj lwm thiab cov paj lawv ntxeev tau rau tus tswv nyiaj. Tab sis muaj ib tug nws tsis ua hauj lwm, nws khawb qhov muab cov nyiaj faus cia vim nws ntshai tsam nws ua cov nyiaj poob tas ces tus tswv nyiaj yuav muab txim rau nws. nws cov nyiaj tsis tawg paj tsis txi tau txiv.
Tus tswv tsawm tus tub txib no thiab txiav txim rau nws.
Kwv tij Hmoob, zaj paj lug no yog Huab Tais Yes Xus tab tom qhia peb tias Huab Tais Ntuj tsim peb los, nws pub ib rab peev xwm rau peb, mas tsim nyog peb yuav pheej xeeb rau peb rab peev xwm ntawd, peb yuav ua muab rab peev xwm mus ua tej hauj lwm tsob hwb Tswv Ntuj thiab ib tsoom kwv tij raws li rab peev xwm yuav ua tau, mas txog hnub Huab Tais Yes Xus rov los, peb thiaj yuav tau nrog nws nyob thiab koom nrog Huab Tais Yes Xus saj kev xyiv fab.
Nyob zoo sawv daws.