KEV NTSEEG HNUB CHIV, TSWV NTUJ LU LUS

Nyob zoo ib tsoom kwv tij Hmoob ntseeg Kav Tos Liv sawv daws, Tswv Qhia Lws Tshais, tus thawj tswj Ntawv Ntshiab Kav Tos Liv hauv Thaib teb tau sau ib tsab ntawv txog cov ntseeg sawv daws. Tsab ntawv no yog hais txog Hnub Chiv Tswv Ntuj Lo Lus yog ncaj rau hnub Chiv tim 26 lub 1 hlis tas los no. Tswv Qhia Lws Tshais sau li No :
Tswv Ntuj cov Lus yog lub zog tuaj ntawm Tswv Ntuj tuaj, yog txoj kev cawm peb txhua leej txhua tus neeg ntseeg. Ntawv sau tseg tias : Tswv Ntuj lo Lus muaj zog thiab muaj hwj chim kawg, vim Tswv Ntuj cov Lus yog lub zog nres lub Koom Txoos thiab txoj kev ntseeg. Yog ib yam txhiam xws thiab yog tus dej ntshiab tsis txawj nqhuab yug peb tus ntsuj plig nyob hauv Tswv Ntuj tsoom tub ki. Vim li ntawd, lub Koom Txoos thiaj ntseeg li ntawd los thiab zeem tseeb txog yav tom ntej tias : Tswv Ntuj cov Lus raug sau cim tseg nyob hauv ntaub ntawv uas yog phau Ntawv Ntshiab, thiab cov kab ke ntshiab.
Vim Tswv Ntuj lo Lus muaj nqis thiab tseem ceeb rau cov neeg ntseeg, mas lub Koom Txoos thiaj zoo siab ua txhua yam los pab cov ntseeg kom sawv daws tau txais lub zog loj ntawm Tswv Ntuj. Txij lub rooj ncauj lus Vas Tis Kas 2 los, phau Ntawv Ntshiab raug muab txhais ua ntau xeem lus, thiab muaj kev tsa ntau pab neeg los ua hauj lwm tshaj Ntuj Lus. Yam li lub rooj Ntawv Ntshiab Kav Tos Liv (CBF) uas raug tsa los kom tau txhawb nqa kev tshaj Ntuj Lus. Tsaib no lub rooj Ntawv Ntshiab Kav Tos Liv tsa los txwm 50 xyoo, tau ua cov hauj lwm Tswv Ntuj cov tub txib thiab tshaj Tswv Ntuj lo Lus rau cov neeg ntseeg, yog ib txoj hauj lwm uas yuav tsum zoo siab lees txais thiab cheem tsum ua. Xyoo no yog txwm 1600 xyoo uas Leej Ntshiab Yes Los tuag, yog tus kws Ntawv Ntshiab nto npe ntawm lub Koom Txoos. Nws yog thawj tug txhais Ntawv Ntshiab ua lus Las Tis Nas. Yog cov lus uas sawv daws to taub zoo nyob rau lub zim txwv ntawd. Lub zog uas ua kom Tswv Ntuj lo Lus mus txog txhua leej txhua tus yog los ntawm nws los. Qhov uas yus tsis paub ntawv Ntshiab, mas yog yus tsis paub Tswv Ntuj.
Lub rooj Ntawv Ntshiab Kav Tos Liv (CBF) thiaj ceeb toom tias hnub tim 1 lub 9 hlis 2019, yog ncaj rau Hnub Chiv lis piam 1 uas yog lub Caij Tos Huab Tais, mus txog hnub tim 30 lub 9 hlis 2020 uas yog hnub hwm Leej Ntshiab Yes Los, mas yog xyoo hwm Tswv Ntuj lo Lus. Vam tias tas ib xyoos uas muab los hwm Tswv Ntuj lo Lus no, yuav pab cov tub tshaj Ntuj Lus thiab txhua pab neeg kom txawj siv nws tus kheej los qhia kev ntseeg. Kom nyias txawj xyaum nyias tus kheej thiab ua siab ntev ua kom Tswv Ntuj lo Lus ciaj sia nyob hauv lub Koom Txoos. Vaj Qhia Fas Ntshis Kus ceeb toom tias : Hnub Chiv lis piam tim 3 hauv lub Caij Nyob Nruab Xyoos, hauv txhua txhua xyoo, mas yog Hnub Chiv hwm Tswv Ntuj cov Lus. Yog hnub nco txog kev kawm txuj thiab tshaj Tswv Ntuj lo Lus. Vaj Qhia tseem hais ntxiv tias : muaj ntau yam hauj lwm ua kom cov neeg ntseeg pom txog qhov muaj nqis ntawm kev tshaj Ntuj Lus nyob hauv cov kab ke, yam li nquam phau Ntawv Ntshiab, tsa tej tus tub nyeem Ntawv Ntshiab thiab muab Ntawv Ntshiab faib rau cov neeg ntseeg. Vaj Qhia kuj hais kom cov tub tshaj Ntuj Lus muab siab rau npaj nthuav Ntawv Ntshiab kom zoo.
Yuav tsum ua raws li Vaj Qhia hais, ces pab kav xwm Kav Tos Liv thiaj nqhua hu kom cov tub tshaj Ntuj Lus thiab cov neeg ntseeg sawv daws muab siab rau thiab saib Tswv Ntuj cov Lus yog qhov tseem ceeb dua. Kom Tswv Ntuj lo Lus nyob hauv Ntawv Ntshiab tau coj peb mus rau txoj kev yeej. Ntawv Ntshiab yog ib phau ntawv uas peb cov neeg ntseeg txhua tus yuav tau nyeem, thiab siv nyob hauv peb txoj kev thov Ntuj. Peb yuav tshawb fawb thiab nrhiav qhov tseeb nyob hauv peb lub neej. Tswv Ntuj lo Lus nyob ze koj, nyob ntawm koj lub qhov ncauj thiab nyob hauv koj lub siab, ces koj yuav coj mus ua raws. Peb yuav vam txog Leej Ntshiab Yes Los, thov kom Leej Ntuj Plig Ntshiab coj peb txoj hauv kev, ua qhov pom kev rau peb, pub lub tswv yim thoob tsib rau peb, kom peb to taub Tswv Ntuj nyob hauv Ntawv Ntshiab. Thov Tswv Ntuj cov Lus coj kev zoo siab tuaj rau peb, thiab kom peb txawj ua tim khawv ncaj ncees txog Tswv Ntuj mus li. Tswv Ntuj lo lus muaj txoj sia, Tswv Ntuj lo lus ua tau hauj lwm. Tswv Ntuj lo lus ntse dua ib rab ntaj ob sab hniav. Nws txeem mus tau hauv tus plig thiab hauv nruab nrab lub tswv yim. Nws mus tau rau hauv cov pob qij txha thiab cov paj hlwb. Tswv Ntuj lo lus txawj txiav txim rau lub siab ntshaw, thiab rau tej zaj tswv yim nyob hauv nruab siab. (HN 4 : 12)
Thov foom hmoov zoo rau nej nyob hauv Tswv Ntuj lub npe.

Tus txhais : Lis Maib, Zoo Tswv Zov Yaj