Zaj nyeem hnub tim 8 lub 12 hlis 2023 (Daily reflection)

ZAJ NYEEM HNUB TIM 8 LUB 12 HLIS, HNUB HWM NIAM MAB LIAB TSIS LO NEEG LUB KEEB TXHAUM
COV LUS NYOB HAUV LUS KAS NTAWV MOO ZOO (LK 1: 26-38)
Kwv tij Hmoob sawv daws, nyob hauv xyoo 1854 tim 8 lub 12 hlis, Vaj Qhia tau tshaj lus zeem tseeb tias Mab Liab yug los tsis lo neeg lub keeb txhaum tiag, ces txij hnub ntawd los, tas cov ntseeg hauv lub Koom Txoos thiaj ua hmoov hwm Mab Liab yug los tsis lo neeg lub keeb txhaum. 
Kwv tij, lub Koom Txoos qhia peb tias Huab Tais Ntuj pub koob hmoov ntau tshaj rau Mab Liab, kom nws xeeb los tsis lo lub txhaum uas As Das thiab Es Vas tau ua puag ntuj tsim teb raug, vim tias Huab Tais Ntuj tau tshwj Mab Liab ua tus yug Leej Pleev. Leej Pleev yog Tswv Ntuj Leej Tub, mas nws yuav tsum tsis muaj qhov txhaum, yog li nws kuj yuav tsum xeeb hauv tus tsis lo neeg lub keeb txhaum los.
Yog li ntawd, peb tsoom neeg ntseeg hauv lub Koom Txoos Kav Tos Liv thiaj hwm Mab Liab ua Tswv Ntuj Leej Niam, thiab peb saib Mab Liab yog peb niam, mas peb thiaj muaj ib zaj cav txog Mab Liab raws li cov lus tus phauj Es Lis Xas Npes tau hais tias “Koj nyob kaj lug Mab Liab, tus tau txiaj ntsim puv siab. Huab Tais nrog koj nyob, koj tau koob tau hmoov tshaj ib zeej tsoom poj niam huv tib si, thiab Yes Xus, lub txiv txi hauv koj tau koob tau hmoov.”
Kwv tij, peb kuj tseem thov Mab Liab pab thov Tswv Ntuj rau peb tias “Leej Ntshiab Mab Liab, Tswv Ntuj Leej Niam, koj pab thov Ntuj rau peb nyem no mus txog peb lub caij dua. Ua li.”
Nyob zoo sawv daws.