Zaj nyeem hnub tim 9 lub 12 hlis 2023 (Daily reflection)

ZAJ NYEEM HNUB TIM 9 LUB 12 HLIS, HNUB NCO TXOG LEEJ NTSHIAB DIS NKAUS
COV LUS NYOB HAUV MAS TAIS NTAWV MOO ZOO (MT 9: 35-36, 10: 1, 5, 6-8)
Cov kwv tij Hmoob, muaj ib lo lus Huab Tais Yes Xus hais hauv hnub no, yog lo lus tias “Qoob loo ntau kawg, tab sis cov tub zog tsawg. Nej thov tus tswv qoob kom nws xa ib co tub zog tuaj sau nws cov qoob.” 
Thaum peb hnov lo lus no, mas peb nco txog tsoom Leej Choj, cov Leej Tij, Leej Phauj uas lawv tau muab tas lawv txoj sia los qee rau Tswv Ntuj kom tau leg Tswv Ntuj txoj hauj lwm. Tab sis yog peb muab saib kom ntxaws ntxaws mas yuavpom tias Huab Tais Yes Xus lo lus no tsis yog ncaj qha hais rau cov Leej Choj thiab Leej Qee xwb, tseem yog hais rau peb txhua tus tau txais lub Cim Ntxuav thiab. Peb sawv daws muaj feem sib pab sau Tswv Ntuj cov qoob raws li peb txoj kab xwm. 
Li cas?
Cov kwv tij, nej cov uas tsis yog Leej Choj los Leej Qee, mas nej yuav pab cov Leej Choj thiab Leej Qee raws li nej pab tau; xws li nyob hauv lub Txoos Txi Ntuj, nej yuav pab nyeem zaj nyeem, pab hu nkauj, pab tu lub txoos kom zoo saib, pab cheb pab ntxuav lub tsev teev Ntuj kom huv; nyob hauv lub Txoos pam tuag, nej kuj yuav sib pab thov Ntuj rau tus tuag, sib pab hais saw Mab Liab, sib pab leg qav leg num kom lub ntees sawv taus ntseg. Dua li tau hais ua piv txwv ntawd, nej kuj tseem yuav ua lub neej mus raws lub Moo Zoo, ua tim khawv txog Yes Xus. Nyob hauv lub cuab, niam txiv yuav sib hlub, me nyuam yuav hwm niam thiab txiv; nyob hauv lub xeem, kwv tij txawj sib hwm txawj sib nyiam; nyob hauv lub zos, sawv daws txawj sib pab sib nres.
Peb sawv daws, nyias yuav leg Tswv Ntuj cov hauj lwm raws li nyias txoj kab xwm mog.
Nyob zoo sawv daws.