Zaj nyeem hnub tim 2 lub 1 hlis 2023 (Daily reflection)

ZAJ NYEEM HNUB TIM 2 LUB 1 HLIS 2024 
NCO TXOG LEEJ NTSHIAB NPAS XIS THIAB LEEJ NTSHIAB NQES NKOS LIS NYOB NIS KES
COV LUS NYOB HAUV ZAM NTAWV MOO ZOO (ZM 1: 19-28)
Cov Hmoob sawv daws, lub Moo Zoo hnub no piav txog Zam Ntxuav Plig teb rau cov neeg tuaj nug txog nws. Cov neeg ntawd pom Zam ua kab ke ntxuav thiab ntuas sawv daws kom hloov siab tshiab, mas lawv xav paub tias Zam puas yuav yog tus Pleev uas cov Yaj Saub tau xub hais txog, los Zam puas yuav yog Es Lias vim Tswv Ntuj tau nqa Es Lias mus saum ntuj lawm, cov Yaj Saub hais tias muaj ib hnub mas Es Lias yuav rov los. Lawv kuj xav paub tias Zam puas yog ib tug neeg sawv ua Yaj Saub.
Zam hais tas tas lus rau lawv tias nws tsis yog tus Pleev, tsis yog Es Lias, thiab nws kuj tsis yog Yaj Saub.
Yog li Zam yog leej twg? Cov neeg ntawd tsis to taub.
Zam thiaj hais qhia rau lawv tias “Kuv yog tus neeg nyob hauv teb chaws quav poj lub suab qw tias ‘nej ua kom Huab Tais txoj kev rov tiaj’, raws li Yaj Saub His Xais tau hais tseg.”
Zam lo lus no txhais tias nws yog tus tuaj npaj txoj kev rau tus yuav lawv nws qab tuaj, nws yog tus tuaj ntuas sawv daws kom tig los yuav lub siab tshiab, kom lawv huv txaus mas lawv thiaj tsim nyog txais tau tus Ntshiab tuaj ntawm Tswv Ntuj tuaj.
Muaj ib yam peb pom ntxiv nyob hauv lub Moo Zoo hnub no, yog pom tias Zam Ntxuav Plig yog ib tug neeg tsis muab hlob thiab nws tsis qhuas txog nws tej hauj lwm. Zam hais tias “Tus ntawd yuav lawv kuv qab tuaj, kuv tsis tsim nyog daws nws txoj hlua khau.”
Cov kwv tij, txhua hnub mas peb yuav tau rov ntxuav peb lub siab, ntxuav peb lub tswv yim kom huv, tshwj xeeb mas yog lub tswv yim muab hlob; mas peb thiaj yuav txais tau tus Ntshiab tuaj nyob nruab nrab hauv peb. Tus ntawd, yog Yes Xus tus cawm peb.
Nyob zoo sawv daws.