Zaj nyeem hnub tim 5 lub 1 hlis 2023 (Daily reflection)

ZAJ NYEEM HNUB TIM 5 LUB 1 HLIS 2024 
HNUB RAU LUB CAIJ YES XUS YUG
COV LUS NYOB HAUV ZAM NTAWV MOO ZOO (ZM 1: 43-51)
Kwv tij Hmoob, lub Moo Zoo hnub no kuj yog txuas los ntawm zaj nag hmo. Nag hmo peb hais tias Tswv Ntuj pub Huab Tais Yes Xus rau peb, mas peb yuav tau pub Huab Tais Yes Xus rau lwm tus thiab; yog tham txog Huab Tais Yes Xus rau lawv mloog thiab coj lawv tuaj pom Huab Tais Yes Xus zoo li As Nres coj Xis Moos Pob Zeb tuaj ntsib Yes Xus.
Hnub no, lub Moo Zoo hais tias Huab Tais Yes Xus tawm mus, nws ntsib Fis Lis Pos mas nws hais kom Fis Lis Pos raws nws mus; yog hais kom Fis Lis Pos los ua Yes Xus thwj tim.
Fis Lis Pos kuj mus hais rau Nas Tas Nias thiab caw Nas Tas Nais los ua Yes Xus thwj tim xws li nws. Fis Lis Pos hais tias “Koj tuaj, koj yuav pom.”
Lo lus no zoo tib yam li lo lus Huab Tais Yes Xus hais rau Zam Ntxuav Plig 2 tug thwj tim tias ‘neb tuaj mas, ces neb yuav pom.”
Cov kwv tij Hmoob, lub Moo Zoo tab tom qhia peb tias thaum peb mus yaum ib tug neeg twg tuaj paub Yes Xus, mas peb yuav hais li cas?
Peb tsis hais dab tsi ntau ntau, peb tsuas hais me ntsis txog Yes Xus rau nws paub, thiab yog nws xav paub ntau dua no mas kom nws qhib siab mloog saib Huab Tais Yes Xus yuav hais dab tsi txog nws. 
Nyob rau lub zim txwv no, qhov yuav hais txog Huab Tais Yes Xus rau lwm tus paub txog, zoo tshaj mas yog cov hauj lwm sib nyiam sib hlub tawm hauv peb ob txhais tes tuaj, lub neej yoog raws Huab Tais Yes Xus tus piv txwv.
Nyob zoo sawv daws.