Hnub Chiv Tim 31 Lub 12 Hlis 2023 (Sunday Homily)

Hnub Chiv tim 31 Lub 12 Hlis Ntuj 2023

Lub lis piam tim 2
Lub caij Yes Xus Yug Los
Lus Kas 2: 22-40

“Thaum txog lub caij yuav ua kab ke ntxuav ob niam tub raws li Mais Xes Txoj Cai, Mab Liab thiab Yos Xes nkawd coj Yes Xus mus pem Yes Lus Xas Les, kom tau cev tus me nyuam rau Huab Tais.”

Nyob zoo…
Kwv tij hmoob sawv daws, hnub chiv no lub Koom Txoos ua hmoov tsuj xeeb hnub tsev neeg ntshiab los hnub cev Yes Xus rau Ntuj hauv lub Tuam Tsev Teev Ntuj. Thiab hnub no yog hnub kawg ntawm lub xyoo 2023 no. Lub Koom Txoos caw peb sawv daws ras txog Yes Xus tsev neeg uas yog Yos Xes, Mab Liab, thiab Yes Xus. Tsev neeg no ua piv txwv ntawm txoj kev ntseeg txog Tswv Ntuj rau peb. Niaj hnub lawv ua neej nyob hauv txoj kev ntseeg. Lawv cia siab rau Tswv Ntuj coj lawv lub neej. Txawm tias muaj teeb meem los xwm txheej npaum li cas, lawv yeej vam khom rau Twv Ntuj tib leeg xwb. 
Hauv zaj nyeem hnub no, peb tau hnov Lus Kas hais txog Yes Xus lub neej thaum nws tseem me nyuam yaum. Lub hom phiaj ntawm zaj no tsis yog xav qhia txog Yes Xus lub keeb kwm, qhov no tsis yog qhov tseem ceeb tshaj plaws. Tab sis mas, qhov tseem ceeb tshaj plaws yog hais tias Lus Kas xav qhia peb txog txoj kev ntseeg txog Tswv Ntuj. Tsev neeg ntshiab los Yos Xes, Mab Liab, thiab Yes Xus lub neej yog piv txwv rau peb yim neeg thiab. Kom peb muaj txoj kev ntseeg txog Tswv Ntuj ruaj ruaj ib yam li Yos Xes, Mab Liab thiab Yes Xus. Kom peb qhia peb cov me tub me nyuam ib yam li Yos Xes thiab Mab Liab qhia me nyuam Yes Xus. Yos Xes thiab Mab Liab cev nkawd tus tub rau Tswv Ntuj, kom Tswv Ntuj pov hwm nws, kom Tswv Ntuj saib xyuas nws, kom Tswv Ntuj nrog nraim nws. Niaj hnub no mas, cov niam cov txiv qhia cov me tub me nyuam zoo kawg lawm tab sis mas thov kom peb qhia lawv kom muaj kev ntseeg thiab. Tsis yog xav kom lawv muaj kev vam meej, kev nplua nug ntawm lub niaj teb xwb. Peb yuav tsum qhia lawv kom nrhiav Tswv Ntuj, kom lawv nrhiav cuab yeej cuab tam ntawm Ntuj lub Ceeb Tsheej thiab os. Peb lub neej mas tsis yog nrhiav nyiag nrhiav txiag, nrhiav suab nhriav npe los yug yus cev qaij daim tawv thiab, tab sis, yus yuav tsum yug yus tus tsuj plig thiab.
Tus sau tsab ntawv txog cov Hes Nplaws hais kom tseem ceeb tias “yog vim Has Nplas Has ntseeg, mas nws thiaj mloog Ntuj hu nws kom sawv kev mu sib lub teb chaws uas nws yuav txais los ua nws lub cuab tam.” Nws hais ntxiv tias “yog vim Xas Las ntseeg, mas tab nws txawm laus keev lawm, nws muaj peev xwm xeeb tub. Yog vim Has Nplas Has ntseeg, mas thaum Tswv Ntuj sim nws, nws cia li muab Is Xas Has txi rau Ntuj.”

Kwv tij zoo nyiam sawv daws, hnub no yog hnub kawg lawm, hnub no thiaj tsim nyog uas peb yuav saib ntawm peb tus kheej thiab ras txog peb txoj kev ntseeg hais tias xyoo qub dhau los lawm peb nyob qhov twj ntawm txoj kev ntseeg txog Tswv Ntuj. Ntawm xyoo tshiab no mas, peb muaj lub hom phiaj li cas ntawm txoj kev ntseeg. Cov niam cov txiv muaj txoj hauj lwm tseem ceeb tshaj plaws ntawm cov tub ntxhais txoj kev ntseeg. Peb yuav tsum rau siab thiab txhawb nqa lawv kom ntseeg txog Tswv Ntuj, kom mus koom thaj txi Ntuj, kom paub teev Ntuj. Thiab cov niam cov txiv tseem muaj hauj lwm tseem ceeb tshaj uas coj lawv tub ntxhais tuaj teev Ntuj. Thiab ua piv txwv rau cov tub cov ntxhais.
Qhov tsis zoo mas, peb tso pov tseg ntawm xyoo qub, hauv lub xyoo tshiab mas, peb thov Tswv Ntuj foom hmoov zoo rau peb txhua leej txhua tus thiab nawb. 

Nyob zoo sawv daws.