Zaj nyeem hnub tim 8 lub 1 hlis 2023 (Daily reflection)

ZAJ NYEEM HNUB TIM 8 LUB 1 HLIS 2024 
HNUB UA HMOOV YES XUS TXAIS KAB KE NTXUAV
COV LUS NYOB HAUV MAS KOS NTAWV MOO ZOO (MK 1: 7-11)
Kwv tij Hmoob sawv daws, nyaj nej yuav xav tias Huab Tais Yes Xus yog Tswv Ntuj, yog tus Ntshiab; ua cas Huab Tais Yes Xus thiaj ua kab ke ntxuav ntawm Zam thiab?
Yog kawg, Huab Tais Yes Xus yog tseem Tswv Ntuj, nws yog tus Ntshiab tsis muaj txhaum tiag, tab sis vim Huab Tais Yes Xus yeem nqes los ua neeg, mas Huab Tais Yes Xus thiaj yuav ua raws li nws yog ib tug neeg. Huab Tais Yes Xus yug los nyob hauv haiv His Xas Lais, nws thiaj yuav tau ua raws li cov His Xas Lais txoj kab ke. 
Cov His Xas Lais, thaum lawv lub cev tsis huv mas lawv yuav mus raus hauv tus dej kom lub cev rov tshiab tuaj, lawv xav ntxuav lub siab kom ntshiab mas lawv yuav mus ua kab ke ntxuav xws li cov neeg tuaj thov txais kab ke ntxuav ntawm Zam. 
Huab Tais Yes Xus yug los nyob hauv haiv His Xas Lais, nws thiaj yuav tsum ua raws li cov His Xas Lai sib txwm coj los, yog txais kab ke ntxuav.
Tab sis hnub no peb hnov tus ntxuav plig Zam hais tias “Kuv muab dej los ntxuav nej kom yog lub cim tias nej tu siab rau nej cov txhaum, tab sis muaj ib tug mas nws yuav ntxuav nej nyob hauv Leej Ntuj Plig Ntshiab; yog nws yuav ntxuav nej tus plig kom rov huv tuaj.”
Hnub tom qab Yes Xus tuaj txog ntawm ntug dej Yos Las Das, nws ua kab ke ntxuav xws li zeej tsoom. Yog peb mus nyeem Mas Tais phau Ntawv Moo Zoo; zaj 3 qib 13-17 mas peb yuav paub tias thaum Zam pom Yes Xus, nws cheem tsis pub Yes Xus txais kab ke ntxuav ntawm nws, tab sis Yes Xus hais rau Zam tias “Cia koj ua rau kuv, wb thiaj tau ua raws txoj kev ncaj.” Zam to taub Huab Tais Yes Xus cov lus, mas nws thiaj mam ua kab ke ntxuav rau Huab Tais Yes Xus.
Cov kwv tij Hmoob, Huab Tais Yes Xus yog tus Ntshiab tiag, nws tsis muaj ib tee txhaum li, tab sis vim Huab Tais Yes Xus xav ua tus piv txwv rau sawv daws pom tias nws nyiam ua raws li Huab Tais Leej Txiv hais. Li ntawd mas cov kwv tij, peb sawv daws puav leej yog Leej Txiv Tswv Ntuj cov me nyuam, peb yog Huab Tais Yes Xus cov kwv cov muam, peb yog Huab Tais Yes Xus cov thwj tim; tsim nyog peb yuav ua zoo li Huab Tais Yes Xus, yog nyiam ua raws li Leej Txiv Tswv Ntuj xav kom peb ua; ua tus neeg me tsis muab hlob, mas Huab Tais Leej Txiv thiaj yuav hais rau peb tias “Nej yog kuv cov me nyuam uas kuv nyiam kawg, nej yog kuv qhov chaw zoo siab!”
Nyob zoo sawv daws.