Zaj nyeem hnub tim 10 lub 1 hlis 2023 (Daily reflection)

ZAJ NYEEM HNUB TIM 10 LUB 1 HLIS 2024 
HNUB PEB LUB LIS PIAM 1 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 1: 29-39)
Kwv tij Hmoob sawv daws, hnub no peb hnov tus Hauv Paus Xa Lus Mas Kos piav txog ob peb yam; xws li Huab Tais Yes Xus kho cov neeg mob, Huab Tais Yes Xus ntiab dab, Huab Tais Yes Xus teev Ntuj, Huab Tais Yes Xus txib kom cov thwj tim nrog nws mus tshaj lub Moo Zoo.
Yog muab piv rau peb lub neej ua hauj lwm, peb yuav pom tias thaum ib tug tswv hauj lwm txib hauj lwm rau peb tas, peb yuav nqes tes ua cov hauj lwm ntawd, peb kuj tseem yuav qhia rau tus tswv paub tias peb leg cov hauj lwm mus zoo li cas rau li cas; puas ntsib teeb meem los tshuav qhov twg ua tsis tau, tus tswv hauj lwm yuav qhia peb thiab txhawb siab rau peb, ces peb rov coj nws tej lus los kho peb txoj hauj lwm thiab ua ntxiv mus.
Huab Tais Yes Xus txoj hauj lwm txais ntawm Leej Txiv los mas nws kuj ua zoo li ntawd; nqes tes ua hauj lwm, nrog Leej Txiv tham, thiab rov ua hauj lwm.
Cov kwv tij, Tswv Ntuj tsim peb los kom tau tsob hwb Tswv Ntuj thiab tsob hwb sawv daws, peb txoj hauj lwm tseem ceeb yog qhov no. Yog li txhua txhua hnub, peb thiaj yuav tau teev Ntuj nrog Tswv Ntuj tham, mloog saib Tswv Ntuj hais dab tsi rau peb. Peb nrog Tswv Ntuj tham tas mas peb mam tawm mus leg txoj hauj lwm tsob hwb ib tsoom neeg nyob puag ncig peb. 
Peb txhob xav tias niaj hnub kuv muaj hauj lwm ua ntau, kuv tsis muaj sij hawm tawm mus tsob hwb lwm tus. Kwv tij Hmoob sawv daws, nyob hauv cov hauj lwm peb niaj hnub ua, yog muab saib zoo zoo, mas yuav pom tias puav leej muaj feem cuam tshuam nrog lwm tus. Li ntawd, yeej yuav muaj ib lub cib fim nyob hauv peb cov hauj lwm kom peb tau ua cov hauj lwm Tswv Ntuj tos kom peb ua xwb xwb. Piv li tus ua zaub ua mov muag, yog nws ntsia pom txoj hauj lwm Tswv Ntuj tos ntawm nws, mas nws yuav muab siab rau nrhiav cov zaub cov mov zoo zoo los ua, nws yuav hliv kev nyiam kev hlub rau hauv nws tej zaub mov, nws yuav ua kom zoo tshaj, kom tus twg noj nws li zaub mov mas tus ntawd tau noj qab nyob zoo, thiab nws yuav tsis rub tus nqe kig kig los yuam rau tus yuav.
Nyob zoo sawv daws.