Zaj nyeem hnub tim 11 lub 1 hlis 2023 (Daily reflection)

ZAJ NYEEM HNUB TIM 11 LUB 1 HLIS 2024 
HNUB TSIB LUB LIS PIAM 1 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 1: 40-45)
Kwv tij Hmoob sawv daws, hnub no tus mob ruas zoo ua ib tug piv txwv rau peb yoog. Nws tuaj ntsib Huab Tais Yes Xus, nws txhos caug thov tias “Huab Tais, yog koj xav mas koj yeej ua tau kom kuv rov huv.”
Tus mob ruas tsis thov kom Huab Tais Yes Xus ua raws li nws lub siab xav, tab sis nws thov kom Huab Tais Yes Xus ua raws li Huab Tais Yes Xus xav xwb. 
Ntau zaus thaum peb thov Ntuj, mas peb pheej yuam kom Tswv Ntuj pub yam ub yam no rau peb raws li peb xav tau; peb tsis nco txog tias tej yam ntawd xyov puas xis Tswv Ntuj siab, xyov puas yog yam Tswv Ntuj npaj tseg rau peb. 
Thaum peb pheej thov kom tau raws li lub siab ntshaw, yog Tswv Ntuj tsis teb los yog Tswv Ntuj pub dua lwm yam rau peb, mas peb ho yws yws rau Tswv Ntuj tias tsis hlub peb, tsis mloog peb zaj thov.
Kwv tij Hmoob sawv daws, peb tus Huab Tais Tswv Ntuj mas zoo li ntawd, nws tsis lam muab tej yam tsis zoo rau peb, nws tsis lam tau lam muab raws li peb cov lus thov; tab sis nws tos kom txog lub caij zoo zoo tso mas nws thiaj pub yam zoo tshaj rau peb.
Peb pom tias muaj coob leej ntau tus, tsis hais peb cov Hmoob xwb, txhua haiv neeg yeej zoo li ntawd; lawv nyiam nqa qaib nqa npua, nqa tswm ciab paj ntoos mus teev mus hawm yam ub yam no kom pub rau lawv raws lub siab ntshaw. Lawv tau raws li lawv thov tiag, mas lawv cia li mus teev tiam tej yam ntawd, lawv saib yam lawv mus teev ntawd ua lawv tus tswv ntuj (god), lawv tso tus tseem Tswv Ntuj pov tseg.
Xav kom peb cov neeg ntseeg sawv daws to taub tias peb tus Huab Tais Tswv Ntuj tsis zoo li ntawd, nws yuav pub rau peb tsis yog raws li peb lub siab xav tau, tab sis nws yuav pub rau peb raws li nws pom zoo pub.
Nej tsis tau li nej thov, los nej yuav tau tso siab tias muaj ib hnub Tswv Ntuj yuav pub yam zoo tshaj qhov nej thov rau nej; yog txoj sia nyob mus li.
Nyob zoo sawv daws.