Zaj nyeem hnub tim 12 lub 1 hlis 2023 (Daily reflection)

ZAJ NYEEM HNUB TIM 12 LUB 1 HLIS 2024 
HNUB NCO TXOG TIM KHAWV NIS KOS LAS NPOOS KAWM
COV LUS NYOB HAUV MAS KOS NTAWV MOO ZOO (MK 2: 1-12)
Kwv tij Hmoob, nyob hauv Mas Kos Ntawv Moo Zoo peb yuav pom tias Mas Kos piav txog Huab Tais Yes Xus txais kab ke ntxuav tas, nws pib leg Leej Txiv txoj hauj lwm tshaj lub Moo Zoo thiab hu cov thwj tim, nws ntiab tus dab tsis huv tawm hauv tus neeg mus; thaum ntawd zeej tsoom tseem tsis paub tias Huab Tais Yes Xus ua tau li cas, lawv hais tias tej zaum yog ib txog kev qhuab qhia tshiab xwb. Tom qab Yes Xus kho Xis Moos niam tais mas thiaj muaj cov neeg coob coob coj lawv tej swm neeg tuaj rau Huab Tais Yes Xus kho thiab ntiab dab. Huab Tais Yes Xus kuj tau kho tus neeg mob ruas kom rov huv tuaj, nws tshaj rau tas lub nroog paub, mas Huab Tais Yes Xus lub moo thiaj ncha mus tas ib cheeb tsam ntawd. 
Nyob hauv hnub no, peb thiaj pom tias muaj neeg coob coob tuaj mloog Huab Tais Yes Xus ua rau puv nkaus lub tsev, mas cov neeg kwv lub txaj tus tuag ceg pw thiaj tsis tau kev chaws los sab hauv, lawv thiaj nce mus rau ruv tsev thiab tho lub qhov txo tus tuag ceg nqes los.
Huab Tais Yes Xus hais rau tus tuag ceg tias “Me kwv, koj cov txhaum daws tas lawm.”
Lo lus no, ua rau cov Fas Lis Xais tsis zoo siab, vim lawv tsuas saib muaj Tswv Ntuj ib tug xwb thiaj daws neeg cov txhaum tau; Huab Tais Yes Xus hais li ntawd mas zoo li nws tsa nws loj cuag li Tswv Ntuj ntag.
Kwv tij Hmoob, cov His Xas Lais lub tswv yim mas zoo li Hmoob lub thiab; lawv saib neeg txoj kev mob nkeeg yog lub txim Tswv Ntuj muab rau neeg ris vim neeg cov txhaum, tus muaj mob thiaj yog tus muaj txhaum. 
Yog peb paub li no, mas peb yuav to taub tias Huab Tais Yes Xus lo lus yog hais rau tus tuag ceg tias “Me kwv, koj qhov mob zoo lawm.”
Li ntawd, Huab Tais Yes Xus thiaij nug lawv tias “Lo lus ‘koj cov txhaum daws tas’, thiab lo lus ‘koj sawv, nqa koj lub txaj, koj mus’; ob lo lus no mas lo twg hais yooj yim dua?”
Raws li nej xav, lo twg yuav hais yooj yom dua? Yeej yog lo tias ‘koj sawv, nqa koj lub txaj, koj mus’. Tab sis Huab Tais Yes Xus xav ntuas tus tuag ceg kom txij hnub no mus, nws yuav tau hloov siab tshiab txhob ua txhaum ntxiv, mas Huab Tais Yes Xus thiaj hais rau nws tias ‘koj cov txhaum daws tas lawm’.
Kwv tij Hmoob sawv daws, hnub no Huab Tais Yes Xus kuj hais cov lus no rau peb thiab.
Nyob zoo sawv daws.