Zaj nyeem hnub tim 13 lub 1 hlis 2023 (Daily reflection)

ZAJ NYEEM HNUB TIM 13 LUB 1 HLIS 2024 
HNUB NCO TXOG LEEJ NTSHIAB HIS LAS LIS
COV LUS NYOB HAUV MAS KOS NTAWV MOO ZOO (MK 2: 13-17)
Cov kwv tij Hmoob sawv daws, lub Moo Zoo hnub no Mas Kos piav tias Huab Tais Yes Xus pom As Fas Yos tus tub hu ua ‘Les Vis’ zaum ntawm rooj sau se, ces nws hu kom Les Vis los raws nws. Raws li peb paub, mas tus Les Vis no yog ‘Mas Tais’.
Lub Moo Zoo piav ntxiv tias Les Vis los yog Mas Tais tau ua ib roog qav txais Huab Tais Yes Xus thiab cov thwj tim nyob hauv nws tsev, mas muaj cov phooj ywg sau se tuaj koom rooj qav ntawd. Cov Fas Lis Xais pom li ntawd mas lawv thuam tias Huab Tais Yes Xus nrog cov neeg txhaum koom rooj mov. 
Tos lawv thuam li ntawd, vim cov His Xas Lais saib cov sau se yog neeg txhaum xws li lawv saib cov pej kum neeg, thiab ib txwm mas cov His Xas Lais tsis chaws mus hauv cov pej kwm neeg los cov neeg txhaum qab ruv tsev li. Lawv ntshai tsam lawv lo txhaum.
Kwv tij Hmoob, Huab Tais Yes Xus yog neeg His Xas Lais tab sis nws tsis xav li cov His Xas Lais. Huab Tais Yes Xus saib sawv daws zoo xws tib yam, sawv daws yog neeg txhaum tib yam, thiab nws yog tus yuav tuaj daws neeg cov txhaum. Tab sis tus neeg twg paub tias nws yog neeg txhaum, mas tus ntawd thiaj yuav tau txais kev cawm. 
Kwv tij, nyob hauv peb lub neej mas peb pom tias muaj 2 hom neeg mob; ib hom mas lawv cav ncauj tias lawv tsis mob ces lawv tsis kam mus cuag kws tshuaj, ib hom mas lawv lees tias lawv mob tiag ces lawv mus nrhiav kws tshuaj kom tau kho lawv.
Txoj kev ntseeg zoo li ntawd, ib txhia hais tias lawv yog neeg zoo, yog neeg ncaj; cov no mas lawv ntsia tsis pom lawv qhov txhaum ces Ntuj cawm tsis tau lawv. Tab sis tus neeg twg nws paub nws qhov txhaum, nws lees tias nws zoo tsis txaus, nws nrhiav kev daws txhaum; mas nws yuav txais kev cawm tuaj ntawm Tswv Ntuj tuaj.
Yog li mas lub Moo Zoo hnub no thiaj ntuas peb sawv daws kom txhob muab hlob, ntuas peb kom lees rau Tswv Ntuj tias peb yog neeg txhaum, peb tu siab rau peb cov txhaum, peb tos nrhw Tswv Ntuj txoj kev cawm, peb thov Tswv Ntuj tuaj cawm peb.
Nyob zoo sawv daws.