Hnub Chiv Tim 28 Lub 1 Hlis 2024 (Sunday Homily)

Hnub Chiv tim 28 Lub 1 Hlis Ntuj 2024

Lub hlis piam tim 4 lub caij Nyob Nruab Xyoo
Mas Kos 1:21-28
“Zeej tsoom qhuas nws cov lus qhia, vim nws qhia lawv xes li neeg muaj peev xwm.” 
Nyob zoo…
Cov kwv tij hmoob sawv daws, hnub no yog hnub chiv hauv lub lis piam tim 4 nyob hauv lub caij Nyob Nruab Xyoo. Peb hnov Tswv Ntuj lo lus nyob hauv Mas Kos Ntawv Moo Zoo. Mas Kos caw peb kom xav tswv yim txog Yes Xus cov lus qhia. Mas kos qhia tias “Yes Xus mus hauv lub tsev txoos, nws qhia sawv daws tam sim ntawd. Zeej tsoom qhuas nws cov lus qhia, vim nws qhia lawv xws li neeg muaj peev xwm, tsis zoo li cov kws Ntawv Ntshiab.” Ntawm no mas peb paub lawm tias Huab Tais Yes Xus cov lus qhia muaj peev xwm thiab nws tsis qhia zoo li cov kws Ntawv Ntshiab qhia. Tsoom pej xeem pom ceeb tias Yes Xus qhia tas mas nws ntiab dab tsis huv thiab kho tus raug dab kom huv tuaj. Yes Xus muaj peev xwm qhia thiab ua kom tshwm sim raws li nws tau qhia. Tsis zoo li cov kws Ntawv Ntshiab uas lawv qhia tsoom pej xeem tab sis mas, lawv tsis ua raws li lawv tau qhia.
Kwv tij zoo nyiam sawv daws, thov peb saib ntawm yus tus kheej, ntawm peb mas, peb cov lus qhia lo peb lo lus puas muaj peev xwm? Kuv ntseeg tias peb lo lus yeej muaj peev xwm kawg yog peb ua neej ua piv txwv rau lwm tus, peb ua neej raws li peb cov lus qhia lwm tus. Peb cov xeeb ntxwv thiab cov me tub me nyuam yeej mloog peb lus kawg. Tab sis mas, yog peb lam hais lus ntau ntau los lam qhia qhia xwb, tab sis, tsis ua dab tsi li, tsis ua dab tsi raws li peb tau qhia, li ntawd mas, leej twg yuav mloog peb lo lus. Peb lo lus kuj tsis muaj peev xwm li. 
Kev tshaj Ntuj lus kuj zoo ib yam thiab. Peb hais tias peb yog neeg ntseeg txog Yes Xus los cov Kas Tos Liv. Tab sis mas, peb tsis ua neej raws li Tswv Ntuj lo lus, peb tsis ua neej raws li Kas Tos Liv txoj cai, mas peb yuav hu yus tus kheej tias peb yog Kas Tos Liv, lo peb yog ib tug neeg ntseeg txog Yes Xus tau li cas? Peb tsis teev Ntuj, tab sis teev dab, peb tsis koom thaj txi Ntuj tsis txais lub Cim Yug, tab sis peb mus ua neeb ua yaig, peb hu yus tus kheej Kas Tos Liv tau li cas? 
Kwv tij sawv daws, Huab Tais Yes Xus caw peb kom ras txog Tswv Ntuj cov lus hnub no, thiab ras txog yus tus kheej tias tam sim no peb ua neej zoo li cas lawm? Peb ua lub neej zoo li Yes Xus uas muaj peev xwm qhia thiab ua piv txwv rau luag tej los peb ua neej zoo li cov kws Ntawv Ntshiab uas lawv hais lus hais lus xwb, tab sis mas, lawv tsis ua dab tsi raws li lawv qhia luag tej.