HMOOB LUB SIAB TXAIJ, TSIM NYOG YUAV CHEB NTXUAV THIAB MUAB DAWS POV TSEG.

Peb Hmoob tshwm sim los ua neeg nyob hauv lub ntiaj teb tau ntev niaj ntau xyoo. Nyob hauv keeb kwm Hmoob txheej dhau txheej tis dhau tis, feem ntau sawv daws puav leej sib pab los txhim kho thiab txhawb nqa lub neej. Tiam sis tseem muaj tug puav nyuag Hmoob uas yuav hais tau tias lawv muaj ib lub siab los sis ib nplooj siab txaij. Lawv siab tsis zoo lawv tseem muaj lub siab phem xav nrhiav teeb meem rov rau Hmoob. Lawv muab Hmoob cev mus rau luag kaw, muab Hmoob taw mus rau luag txiav, muab Hmoob txoj sia txov kom tu mus. Cov Hmoob uas coj tus cuj pwm no raws li kuv tau tshuaj ntsuam los mus kuj muaj nyob txhua lub sij hawm hauv Hmoob lub neej.
Nyob Tuam Tshoj teb chaws, suav txij lub sawm fem uas Hmoob ua lub neej nyob hauv kev caij tsuj , quab yuam, ntxub ntxaug uas tau sawv los ua tsov rog tiv thaiv luag txoj kev cai iab ntsim no, cov Hmoob uas muaj lub siab tsis zoo raws li tau hais los ntawd, kuj tseem tshwm muaj coob. Peb yuav pom tau tias muaj ib txhia vim yog nws ruam los nws siab nyias ces thiaj raug luag ntxias dag tau. Nws thiaj tau qhia Hmoob qhov chaw nyob rau luag, qhia qhov chaw tuag rau yeeb ncuab hlais. Muaj tej tus tseem coj kiag cov yeeb ncuab tuaj mus tsuj tua thiab. Hos muaj ib txhia mas nws yeej ntse yeej paub, tiam sis yog vim nws lub siab txaij siab phem siab dub, ces nws xwb tim siv tom txwv rov rau Hmoob. 
Dua no lawd, peb Hmoob tseem muaj ib lub siab uas saib yus tus thawj tsis rau nqi pes tsawg. Tsis tas li ntawd xwb, haj tseem khib xeeb khib oom kawg li thiab! Pheej tias yog nws lub luag hauj lwm ces kav chawj nws! Xij peem! Nws ua tau li cas los ua, ua tsis tau los tsum! Hais yog ces yuav, hais tsis yog ces rhuav! 
Vim li no peb sawv ua lub luag hauj lwm twg los thiaj pheej tsis ruaj khov pes tsawg. Muaj tseeb tiag tias : kaum leej txhawb los tseem muaj ib leeg thau, kaum leej txhawb los yeej tseem nyuaj thiab hnyav kawg nkaus. Es yog tseem muaj ib tug los thawb, thiab ces hauj lwm yuav ua cas ntseg taus?
Piv tau li nej muaj ib lub lauj kaub zaub, yog nej hliv ib dia suab thaj rau tej zaum yeej tsis tau qab pes tsawg, tiam sis yog hliv ib dia kua txob rau mas twb ntsim heev lawm, yeej noj tsis taus li. Sawv daws thiaj pom tau tias yus ua kaum yam hauj lwm zoo, los xyov luag puas pom? Yus pab luag kaum zaus los xyov luag puas nco ?  Tiam sis yog yus ua ib yam hauj lwm phem los puas tsa ncauj muab luag cem mas luag nco ntsoov mus ib txhis. Li ntawd, yus tseem muab luag lub cev ntaj ntsug tua kiag los puas coj mus rau yeeb ncuab hlais ib daig zuj zus thiab tsim kom tuag kiag :  yog li es luag puas chim los tsis chim ? Kuv xav tias txawm yog leej twg los yeej chim xwb xwb li. Piv li thaud Huab Tais Vwj Paj Yig sawv los ua Hmoob tus coj,  nws nqua hu sawv daws tua yeeb ncuab, nws yog ib tug muaj txiaj ntsim loj nyob hauv tsoom Hmoob.Vwj Looj Teeb kuj yog ib tug neeg ntse thiab nplua nuj tsim nyog nws yuam los pov hwm thiab pab txhawb nqa Vwj Paj Yig lub hwj chim thiab pab tsoom Hmoob. Cas nws ho tsis ua li ntawd? Nws tseem yuav muab haiv Hmoob tsuj nthi rau hauv qab xib taws. Nws coj cov yeeb ncuab rov mus tua Hmoob thiab ntes kiag tau Vwj Paj Yig, coj  mus rau Suav muab tua muab hlais. Txog qhov kawg, lawv tsis yog tua Vwj Paj Yig ob tug tub xwb, hos tseem muab Vwj Paj Yig tsoom xeeb leej xeeb ntxwv tua tu noob nrho. Vwj Looj Teeb puas yog Hmoob? Nws lub siab phem npaum li cas!
Vam txog : Liaj Luv Xa Moo 2/1999
Tus sau : Txam Xyooj, Cob Tsib teb