NTHUAV NTAWV MOO ZOO HNUB TIM 6/3/2020

Lis piam 1 Caij Plaub Caug.
Txoj kev ncaj tshiab zoo dua txoj qub. (MT 5 : 20 – 26)
Ces Yes Xus hais tias : “Kuv hais rau nej : yog nej tsis ua siab ncaj dua cov Kws Ntawv Ntshiab thiab cov Fas Lis Xais, mas nej yuav mus tsis tau hauv Ntuj lub Ceeb Tsheej.
Nej hnov cov lus qhia rau tej laus thaud tias : Koj tsis txhob tua neeg. Tus twg tua neeg, nws yuav raug luag txiav txim rau nws. 
Hos kuv, mas kuv hais rau nej : Leej twg npau taws rau nws tus kwv, nws yuav raug txim ntawm tsev hais plaub. Yog nws hais rau nws tus kwv tias ‘Niag ruam’ mas nws yuav raug txim ntawm lub rooj txwj laus Xas Nes Nrees. Yog nws hais rau nws tus kwv tias ‘Niag vwm’, mas nws yuav raug txim nyob hauv dab phem cov hluav taws. 
Thaum koj cev ib co txim rau saum lub thaj txi Ntuj, yog koj nco dheev tias koj tus kwv tau muaj lus rau koj lawm. Mas koj cia li tso koj cov txim rau ntawm lub thaj txi Ntuj, koj mus nrog koj tus kwv hais kom haum tso, koj mam rov los cev koj cov txim. 
Thaum koj nrog tus neeg ntxub koj tseem ua ke mus kev, koj kav tsij nrog nws hais kom haum, tsam nws coj koj mus kom rau tus txiav txim, ces tus txiav txim muab koj cob rau tub ceev xwm kom muab koj kaw hauv tsev loj faj. 
Kuv hais tseeb rau koj, koj yuav tawm tsis tau hauv tsev loj faj, mus txog thaum koj rho nyiaj qab nas txog npib kawg nkaus los them.”