LEEJ TWG YOG TUS TSEEM PHOOJ YWG ?

Nyob zoo tsoom kwv tij phooj ywg sawv daws, zoo siab hnub no rov tau tuaj nrog ib tsoom phooj ywg sawv daws sib fim nyob rau hauv phau ntawv Liaj Luv Xa Moo no. Cov phooj ywg sawv daws, hnub no kuv kuj yuav muab ib zaj lus muaj lub ntsiab tias : “Leej twg yog tus tseem phooj ywg ?” coj tuaj tham thiab sib pauv tswv yim nrog nej sawv daws.
Muaj ib tug txiv neej, nws muaj 4 tug phooj ywg. 
Thawj tus phooj ywg, mas nws hlub tshaj plaws, yuav mus qhov twg los 2 leeg mus ua ke, sib paub siab, sib raug zoo. Nws tus phooj ywg xav yuav yam twg, xav tau yam twg, los nws nrhiav los rau tib si. 
Tus phooj ywg tim 2, nws hlub heev li, nws ua txhua yam rau tus phooj ywg no, thiab mus tsham xyuas nws tas li. 
Tus phooj ywg tim 3, nws hlub thiab saib xyuas txhua yam li nws ua tau. Tus phooj ywg tim 4, nws tsis tshua quav ntsej txog, tsis mus saib tsis mus xyuas li, thiab qee zaus tseem hnov qab txog lawm thiab. 
Lub sij hawm dhau mus tsis ntev, tus txiv neej no nws tau txais ib tug kab mob loj heev nyob hauv nws lub neej. Ua ntej nws yuav ncaim hauv lub ntiaj teb no mus, nws tau mus nrog nws thawj tus phooj ywg tham. Nws tau tham thiab tau piav txhua yam rau nws tus phooj ywg mloog, ces nws nug nws tus phooj ywg tias : “Phooj ywg ! Yog kuv tuag lawm, koj yuav ua li cas ?”  Tus phooj ywg teb tau tug tsis qab tsis tsuag tias : “Yog koj tuag lawm, ces wb kev phooj ywg kawg tag li no xwb.” Lo lus teb no, zoo cuag li xob tua tib rhe rau hauv nws nruab siab, ua rau nws mob siab thiab tu siab heev. Nws khuv xim tias : tsis tsim nyog qhov yav tag los nws ua txhua yam rau nws phooj ywg kiag li. 
Tom qab ntawd, nws thiaj li mus tsham nws tus phooj ywg tim 2. Vim txoj kev mob siab ntsim siab, nws thiaj tau tham tas txhia yam rau tus phooj ywg tim 2 mloog. Nws kuj nug lo lus qub tias : “Phooj ywg ! Yog kuv tuag lawm, koj yuav ua li cas ?”  Tus phooj ywg tim 2 kuj teb tug niag tsis qab tsis qauj tias : “Yog koj tuag lawm, ces kuv kuj muaj dua phooj ywg tshiab xwb.” Lo lus teb no kuj rov zoo li xob tib rhe rau hauv nws nruab siab thiab, ua rau nws tu siab thiab khuv xim nkawd txoj kev ua zoo yav tag dhau los.
Nws thiaj mus ntsib tus phooj ywg tim 3. Nws pib qaug zog zuj zus, tsis muaj lub zog kiag li. Nws piav txhua yam rau tus phooj ywg mloog thiab rov nug tib lo lus qub tias : “Phooj Ywg ! Yog kuv tuag lawm, koj yuav ua li cas ?’’ Tus phooj ywg tim 3 thiaj teb tias : “Yog koj tuag lawm, kuv mam tuaj xa koj !” Lo lus no ua rau nws ib ce xoob zog tuaj thiab zoo siab me ntsis, vim tseem muaj tus hlub thiab txhawj txog nws. Cov lus no ua rau nws ras thiab nco txog tus phooj ywg tim 4, uas nws tsis tau mus tsham thiab tsis tshua xav txog. Ces nws thiaj mus ntsib tus phooj ywg tim 4, thiab muab nws lo lus uas twb xub nug 3 tug phooj ywg tag los lawd, coj los nug tias : “Phooj ywg ! Yog kuv tuag lawm, koj yuav ua cas ?” Tus phooj ywg tim 4 thiaj teb tias : “Yog koj tuag, kuv yuav lawv koj qab mus !” Thaum nws hnov phooj ywg lo lus teb, mas tsim nyog nws yuav zoo siab. Tab sis haj yam ua rau nws tu siab tshaj qhov qub tuaj. Txhua yam lig dhau lawm, vim tias thaum tseem noj qab nyob zoo, nws saib tus phooj ywg no tsis rau nqi, tab sis nws tus phooj ywg no kuj tsis muaj lub siab yuav muab nws pov tseg kiag li. Lub sij hawm dhau mus tsis ntev, ces tus txiv neej no txawm tso lub ntiaj teb no tseg lawm. Nws 4 tug phooj ywg los kuj puav leej tau tso lub ntiaj teb no tseg lawm thiab. 
Cov phooj ywg sawv daws ! Peb ua neeg nyob hauv lub qab ntuj no, peb sawv daws kuj puav leej muaj 4 tug phooj ywg zoo li hais no nyob nrog nraim peb thiab. Ua li 4 tug phooj ywg no, ho yog leej twg thiab zoo li cas ned ?
Xws li thawj tug phooj ywg, mas nws yog peb lub cev ntaj ntsug : vim lub sij hawm thaum peb tseem ua neej nyob, peb saib xyuas thiab ua txhia yam pub rau nws. Nws xav tau yam twg, los peb yuav nrhiav kom tau los rau nws. Tab sis thaum peb tso lub ntiaj teb no tseg lawd, nws yuav nrog peb mus tsis tau, nws yuav rov mus ua plua av tag lawm xwb. 
Tus phooj ywg tim 2, mas nws yog peb lub cuab tam : vim lub caij thaum peb tseem ua neej nyob, peb yuav ua txhua yam kom tau coj los ua peb tug. Tab sis thaum peb tso lub ntiaj teb no tseg lawd, nws yuav nrog peb mus tsis tau, nws yuav hloov mus ua lwm tus tug lawm.
Tus phooj ywg tim 3, mas nws yog peb niam thiab peb txiv, peb poj niam me nyuam thiab peb tej txheeb ze : vim thaum peb tso lub ntiaj teb no tseg lawd, lawv tsuas yog tus tuaj nta, tuaj koom peb lub ntees thiab tuaj quaj plhws tu siab xwb, qhov kawg lawv thiaj yog tus tuaj xa peb.
Tus phooj ywg tim 4, mas nws yog peb txoj kev zoo : vim thaum peb ncaim lub ntiaj teb no mus lawd, txhua yam peb yuav nqa nrog peb mus tsis tau. Tsuas yog peb txoj kev zoo thiaj tseem nyob nrog peb lub meej mom nyob mus lawm yav tom ntej xwb. Qhov kawg tsuas tshuav txoj kev zoo thiab txoj kev phem nyob ua puav pheej rau peb cov xeeb zeej xeeb ntxwv yav tom qab lawm xwb. Txoj kev zoo uas yus tau ua thaum tseem muaj txoj sia nyob, yog yus tuag ces nrog yus mus lawm. Leej twg khaws tau, ces nws txawj ua zoo. Hos tus khaws tsis tau, ces nws yuav tsis pom yus txoj kev zoo.
Ib tsoom phooj ywg sawv daws ! Kuv tsuas tuaj nrog nej sib fim pauv tswv yim li no xwb ! Lwm zaus muaj caij nyoog, peb mam rov los sib ntsib dua. Thov kom nej txhua tus uas nquag nyeem Liaj Luv Xa Moo thiab Tseb Nplej, nyob kaj siab lug hauv txoj kev sib nyiam sib hlub mus li mog !
Tus sau : Ntxhw Lis (Liaj Luv Xa Moo 2/2015)