COV ROOB

Cov roob yog cov caj av siab sawv nyob saum npoo ntiaj teb. Nyob tej thaj chaw muaj roob ntau, nyob tej thaj chaw kuj tsis muaj heev. 
Tej zaum muaj tej lub roob twm zeej sawv nyob hauv tiaj xws nyob Vaas Vias, los sawv ua tej leej xws li Phwv Nyawm, los ua tej ntsauv xws li cov roob Phus Npiab.
Cov roob nyob hauv Los Tsuas teb tsuas yog tej ces nyob hauv ntsauv roob loj His Mas Las Yas. Cov roob His Mas Las Yas nyob Is Ntias qaum teb yog leej roob siab tshaj tas ntiaj teb. Cov roob ntawd muaj cuaj lub ncov siab dua 8,000 mev. Cov roob His Mas Las Yas nthuav tuaj kawg rau toob fab. Tos cov roob nyob Los Tsuas teb tsis siab heev vim yog cov roob kawg xwb.
Nyob As Mes Lis Kas sab puas Pes Xis Fis, yog ib leej roob siab thoob plaws pej mus rau naj : txij As Las Kas mus txog tw Av Hluav Taws, ntev li 15,000 Km. yog leej roob ntev dua tej nyob tas ntiaj teb. Muaj ntau lub roob siab tshaj 6,000 mev. Leej roob ntawd ib nyuag qis zog nyob As Mes Lis Kas Nrab.
Nyob ntiaj teb muaj ob hom roob, cov roob tshiab thiab cov roob laug.
Cov roob laug yog tej lub kheej, du thiab qis; xws li cov roob nyob Aws Los Pas Pej, los cov roob As Pas Las nyob As Mes Lis Kas toob fab. Cov roob tshiab yog roob siab muaj toj ntxhab, muaj ncov ntse; xws li cov roob His Mas Las Yas, cov roob Pob Tsuas nyob As Mes Lis Kas xib fab los xws li cov roob As Paws nyob Fab Kis qab teb.
Tiam sis cov roob yaig sai los tsis sai yog los ntawm av tawv los av phom. Thaum cov av tawv, mas cov roob maj mam yaig, thaum cov av phom mas cov roob yaig thiab qis sai dua.
Tej lub rob kuj muaj av tawv thiab av phom. Thaum cov av phom yaig tas, ntws tas, ces tshuav cov av tawv tshwm yam li tej roob tsuas nyob Los Tsuas teb uas sawv ua tej phab ntseg ntsees xws li cov roob Phuaj Thoos, roob Moos Kas Xis, los roob Vaas Vias.
Cov roob zeb dub yaig ua tej lub lag zeb xws li cov roob Npos Los Vees nyob Pav Xes.
Cov roob yaig tau kheej thiab du yog roob av phom xwm yeem. Nyob Los Tsuas teb qhov tau yog roob kheej thiab du hauj sim, xws li nyob Xeev teb cov roob Phus Khas Npos thiab Phus Kej.
Nyob qhov twg muaj roob siab mas kuj muaj hav toj thiab, vim tias thaum tej lub zog loj tshoom hauv plawv ntiaj teb tuaj ua kom muaj roob sawv, mas nyob tej qhov chaw av kuj qis los tawg mus ua hav.
Tseem muaj tej lub hav uas yog dej khawb. Dej ntws phua roob phua hav ces dej khawb kwj, dej kaw tej phab zeb phab tsua ua tej lub ntsa tej lub tsag siab, xws li nyob ob peb ntus ntawm tus dej Naj Nyeej, los Naj Us.
Cov roob siab dua cov nyob ntiaj teb :
Nyob As Xias yog lub roob Es Ves Les, siab 8,847 mev.
Nyob As Mes Lis Kas Naj, lub roob As Koos Kas Nkuas, 6,958 mev.
Nyob As Mes Lis Kas Pej yog lub roob Mas Kees Les siab 6,187 mev.
Nyob As Fis Kas yog lub roob Kis Lis Maas Ntsa Los siab 5,895 mev.
Nyob Aws Los Pas teb yog lub roob Dawb siab 4,807 mev.
Nyob Os Xes As Nias yog lub roob hluav taws Maus Nas Los As nyob Has Vais siab 4,168 mev.
Vam txog Yaj Mim phau ntawv ‘Ntiaj Teb’ luam nyob Xis Moos, Los Tsuas teb, kwv yees xyoo 1970