YEEM TUAG CAWM LWM TUS

Txiv Plig Nkus Is Xes Pes (Giuseppe Verde) uas nws muaj hnub nyoog 72 xyoos, nws yog tus Txiv Plig nyob hauv lub tsev teev Ntuj lub nroog Khas Nos Kos, lub xeev Npaws Kas Mos. Nyob hauv lub nroog Khas Nos Kos, mas yog ib thaj tsam uas tus kab mob Covid-19 tab tom sib kis loj tshaj nyob thoob ntiaj teb. Thaum Txiv Plig Nkus Is Xes Pes mob Covid-19, mas cov neeg ntseeg coj nws mus pw nyob hauv tsev kho mob. Nyob hauv tsev kho mob, mas muaj cov neeg mob Covid-19 pw coob coob pw puv nkaus. Vim neeg coob coob, mas cov tshuab rau pa kuj tsis txaus siv. Txiv Plig Nkus Is Xes Pes nws yeej muaj ib tug mob nyob hauv nws cev lawm, thiab nws hnub nyoog 72 xyoos, pom tau tias Txiv Plig yog ib tug neeg mob txaus txhawj heev nyob hauv cov neeg laus uas kis tus kab mob Covid-19. Thaum Txiv Plig Nkus Is Xes Pes pw nyob hauv tsev kho mob, mas nws pom tib neeg ua ntxhov pes hnyo thiab muaj coob leej tsis muaj tshuab pab lawv ua pa. Thaum cov kws kho mob nqa lub tshuab rau pa los rau Txiv Plig Nkus Is Xes Pes, mas nws tsis kam siv. Vim Txiv Plig pom tias tseem muaj coob leej neeg uas lawv muaj mob li nws, tab sis lawv lub hnub nyoog tseem tsawg, ces phim lawv yuav tau siv tshuab pab lawv ua pa. Tam sim no cov neeg tuag los ntawm tus kab mob Covid-19 nyob Is Tas Lias teb, twb muaj txog 6,000 tawm leej lawm. Lub lis piam tag los, Txiv Plig Nkus Is Xes Pes thiaj tau tag sim neej rau tus kab mob Covid-19, nyob hauv lub tsev kho mob Los Vias. Txiv Plig Nkus Is Xes Pes txoj kev tuag, mas neeg cav ncha ntws mus thoob Is Tas Lias teb thiab lub Koom Txoos qhuas kawg. Thaum tsheb thauj Txiv Plig Nkus Is Xes Pes lub cev tuag tawm ntawm tsev kho mob mus rau tom toj ntxas, mas tsoom pej xeem sawv daws quaj tu siab thiab qhuas txog nws nyob puv ob sab ntug kev. Vim li ntawd, tus Txiv Plig Ntses Mas Tis (Jame Matin) Yes Xus Is uas tuaj ntawm As Mes Lis Kas teb tuaj, tam sim no nws yog tus kav xwm nyob Vas Tis Kas, nws qhuas txog Txiv Plig Nkus Is Xes Pes txoj kev tuag thiab thov nqua hu kom tsoom neeg ntseeg cav txog Txiv Plig Nkus Is Xes Pes nyob hauv Vas Tis Kas Onlines. Txiv Plig Jame Matin hais tias : Txiv Plig Nkus Is Xes Pes txoj kev tuag, yog ib txoj kev zoo siab tiv kev txom nyem pub kom lwm tus dim, yog ib txoj kev tsim koob hmoov loj heev nyob hauv lub Koom Txoos. Txiv Plig Nkus Is Xes Pes txoj kev tuag zoo cuag li Leej Ntshiab Mab Liab Mas Xis Mis Lias (Saint Maximilian Maria Call) uas nws zoo siab tuag theej cov His Xas Lais lub txhoj, nyob hauv lub yeej thoj nam kaw neeg hauv ntsuj tsov rog ntiaj teb zaum 2. Is Tas Lias teb muaj neeg tuag los ntawm tus kab mob Covid-19 yog 6,820 leej. Nyob hauv 6,820 leej no, muaj 60 leej yog cov Txiv Plig. 

Tus txhais : Lis Maib, Zoo Tswv Zov Yaj