ROV SIB HAUM XEEB

Nyob hauv peb txoj kev ntseeg, hais txog kev rov sib haum xeeb muaj ntau txoj kev. Yam li ; nrog phooj ywg rov sib haum xeeb, nrog tus yus hlub rov sib haum xeeb, nrog niam nrog txiv rov sib haum xeeb, nrog yus tus yeeb ncuab rov sib haum xeeb thiab nrog Tswv Ntuj rov sib haum xeeb. Tsis hais yuav nrog tus neeg twg, nrog leej twg rov sib haum xeeb los puav leej zoo tas, thiab yog qhov uas peb tsim nyog ua. Rov sib haum xeeb, lo lus no raws li ntawv Aas Kiv hais Reconcile yog txhais tias : yus muaj kev sib chim lawm, ces rov sib hais kom sib haum xeeb. Yam li cov kws txoj cai hais lus ntxias kom cov niam txiv xav sib nrauj rov sib haum xeeb. 
Nyob hauv tus Hauv Paus Xa Lus Paj Lug tsab ntawv uas sau rau cov ntseeg nyob Kos Lis Nthos, mas Paj Lug tau hais tias txhua yam yog los ntawm Tswv Ntuj los, Tswv Ntuj yog tus ua kom peb txawj nrog Tswv Ntuj sib haum xeeb. Tswv Ntuj muab txoj kev sib haum xeeb no rau peb, kom peb coj tas lub ntiaj teb neeg los nrog Tswv Ntuj sib haum xeeb. Tswv Ntuj tsis nyiam muab txim rau neeg, tab sis Tswv Ntuj pub kom peb rov sib haum xeeb. Tus Hauv Paus Xa Lus Paj Lug txhais lub ntsiab lus no hais txog lub neej tshiab nyob hauv Tswv Ntuj thiab hais txog kev rov sib haum xeeb 4 zaug sib law. 
Qhov tseem ceeb ntawm Huab Tais Yes Xus nqes los ua neeg nyob ntiaj teb no, yog vim txoj hauj lwm ua kom ntiaj teb neeg rov nrog Tswv Ntuj sib haum xeeb. Vim Tswv Ntuj yog tus tsim ntuj tsim teb thiab tsim tas puas tsav yam zoo nkauj thiab muaj txhij txhua, neeg yog Tswv Ntuj tus duab uas zoo tshaj tsis muaj chaw tib, tab sis vim dab phem Xas Tas tau haub ntxias neeg kom yuam kev, ces neeg thiaj yuam kev ntawm tus neeg ntshiab huv mus ua neeg txhaum. Kom neeg rais mus ua Tswv Ntuj tus yeeb ncuab. Nyob hauv Ntawv Ntshiab tau hais tseg tias : “Tswv Ntuj yog kev hlub.” Vim li no Tswv Ntuj thiaj xa nws Leej Tub Twm Zeej nqes los ua neeg xws li peb, kom tau ua cov hauj lwm coj ntiaj teb neeg rov los nrog Tswv Ntuj sib haum xeeb. Peb twb tau hnov zaj hais txog tus yaj poob zoo thiab zaj hais txog tus tub ploj lawm thiab nws rov los cuag nws txiv. Huab Tais Yes Xus xav kom peb ua zoo li ntawd.