DEJ SIAB HMOOB NYOB PEM ROOB

Hmoob Tseej Maim thauj 1,400 kg zaub pob mus pub rau tsoom pej xeem Thaib, lub sij hawm sawv daws nyob tiv thaiv tus kab mob Covid-19.
Tab txawm Hmoob yog ib haiv neeg tsawg nyob Thaib teb, tsis kav Hmoob kuj sib hlub thiab muaj dej siab hlub cov pej xeem Thaib. Lub zim txwv no muaj tus kab mob Covid-19, ces cov Hmoob cog zaub pob lawv tsis tau kev thauj zaub mus muag thiab tej kiab khw txais zaub kaw tas. Vim li ntawd, cov Hmoob nyob Tseej Maim uas lawv ua teb cog zaub pob thiaj txiav txim siab muab lawv cov zaub txiav coj mus faib pub rau tsoom pej xeem Thaib noj dawb. Hnub tim 16 lub 4 hlis no, nyob ntawm txoj kev Chos Tas Nas hauv lub nroog Tseej Maim, muaj cov Hmoob thauj zaub pob mus faib rau tsoom pej xeem Thaib. Cov pej xeem Thaib uas hla mus los nyob ntawm txoj kev ntawd, mas lawv txais cov zaub pob ntawm Hmoob mus noj. Cov zaub no yog pub dawb xwb tsis yuav nyiaj. 
Yawg Somkhid Laohang uas nws yog tus toj xeem ntawm lub nroog Maetaeng, xeev Tseej Maim hais tias : nod yog dej siab ntawm cov neeg toj siab xa mus rau cov nyob hauv nroog, vim cov neeg nyob hauv nroog yog cov neeg ua liaj ua teb lub zog. Tam sim no muaj tus kab mob Covid-19, ua rau sawv daws kub ntxho kawg. Kev muas txhiam laj txhiam xws noj kuj tsis yooj yim. Cov thawj coj thiab cov Hmoob cog zaub thiaj pom tias : kev yuav thauj ib tsheb zaub mus muag deb deb mas tsis tsim nyog lawm. Vim tej khw txais zaub kaw tas thiab tus nqi zaub kuj poob nqis. Tsis tas li ntawd, kuj tsis paub tias kev mus los puas yuav kis kab mob thiab. Qhov zoo tshaj, mas yog thauj zaub mus pub rau tsoom pej xeem Thaib kom tau noj lub caij sawv daws nyob hauv tsev tiv thaiv tus kab mob Covid-19. Vam tias sawv daws yuav tuaj yeem tiv thaiv thiab hla dhau lub sij hawm kub ntxhov no mus. Vim li ntawd, cov kwv tij Hmoob uas cog zaub thiaj sib sau txiav lawv cov zaub thauj nqes mus hauv nroog, coj tuaj faib rau tsoom pej xeem Thaib noj. Cov zaub uas Hmoob thauj mus faib, yog 1,000 tawm kis lus. Vam tias yuav pab daws tau tsoom pej xeem Thaib pluas noj pluas haus me ntsis thiab feem coob yuav tau txais Hmoob cov zaub.