HUAB TAIS NTUJ LUB SUAB COJ KEV THAJ YEEB TUAJ CUAG PEB

“Tswv Ntuj tib lub suab xwb thiaj hais txog kev paub qhov zoo thiab phem.”
-Vaj Qhia Fas Ntshis Kus-

Nyob hauv Hnub Chiv Tus Zoo Tswv Zov Yaj los yog Hnub Chiv hauv Lis Piam 4 Caij Hla tas los no, Vaj Qhia Fas Ntshis Kus nthuav Ntawv Moo Zoo hais txog lub tswv yim paub qhov zoo thiab qhov phem.
Vaj Qhia hais tias nyob hauv Ntawv Moo Zoo mas Huab Tais Yes Xus hais tias : Nws hu nws cov yaj, nws tuav lawv ib leeg zuj zus lub npe, nws coj lawv mus. (Z 10:3)
Vaj Qhia kom peb cim lo lus no cia

“Huab Tais Tswv Ntuj hu peb lub npe, Huab Tais Tswv Ntuj hu peb vim nws nyiam peb.”

“Nyob hauv Ntawv Moo Zoo peb yuav pom tias muaj lwm luab suab uas peb yuav tsis txhob mloog : lub suab ngtawd yog cov tub sab luab suab.”
Vaj Qhia hais ntxiv tias muaj ntau lub suab nrov nyob hauv peb, tiam sis tsuas muaj Tswv Ntuj tib lub suab xwb thiaj hais txog kev paub qhov zoo thiab phem.
“Peb yuav kawm kom peb paub mloog tias lub suab twg yog Tswv Ntuj lub thiab lub suab twg yog dab phem lub. Huab Tais Ntuj thiab Xas Tas cov lus sib txawv, Huab Tais Tswv Ntuj lub suab tsis yuam peb : Tswv Ntuj cev nws rau peb. Xas Tas lub suab txawj ntxias thiab ntaus peb : yog daim duab zoo nkauj npog peb qhov muag, tiam sis nyob tsis ntev.”
Vaj Qhia Fas Ntshis Kus ntuas tias dab phem lub suab meem txog thiab ua kom peb poob rau kev ntshai los yog tu siab. Tswv Ntuj lub suab coj peb tawm mus nrhiav qhov zoo thiab kev thaj yeeb tseeb.
Kawg no Vaj Qhia xaus cov lus ntuas tias “Huab Tais Tswv Ntuj lub suab thiab dab phem lus suab sib txawv. Dab phem lub suab hu hauv qhov tsaus ntuj tuaj thiab yog lus dag lus ntxias, yog lus xaiv lus cua; Huab Tais Tswv Ntuj hu hauv qhov pom kev, hais qhov tseeb, thiab hais txog ncaj ncees.”
“Peb yuav ua Ntuj tsaug thiab thov Huab Tais Ntuj kom peb hnov tus zoo tswv zov yaj lub suab hu thiab coj peb tawm mus cuag lub tshav zaub mos.”