MUAJ NQIS DUA KUB

Nyob ntiaj teb no, txhua leej txhua tus tsis hais haiv neeg twg yeej ntsia pom tias : yam muaj nqis tshaj yog nyiaj kub thiab hlaws npliag deg. Tab sis tej nyiaj kub thiab hlaws npliag deg ntawd tsis muaj ib tug neeg twg yuav cia li muab los noj tau. Yog thaum muaj nyiaj kub thiab hlaws npliag deg puv nkaus hnab, tab sis tsis muaj mov lawm yuav mus muas mov qhov twg los noj, yuav muab tej nyiaj kub, tej hlaws npliag deg ntawd coj los noj ua mov puas tau ?
Txhuv los sis mov thiaj yog yam muaj nqis tshaj nyiaj kub. Peb ua tib zoo xav ib me ntsis tias : ib lub txhuv ua ntej yuav tsheej los ua ib lub mov nws siv sij hawm ntev npaum cas, tsawg lub hlis thiaj mam tau noj. Pib txij thaum coj lub noob nplej mus faus rau hauv av, nrhau kaus, loj hlob thiab txhawv ua hnab npej, nws siv sij hawm ntev npaum cas.

Neeg yog tus cog qoob, Tswv Ntuj yog tus tso dej nag ywg thiab tso tshav tuaj ziab, ces tej qoob loo thiaj txawj hlob, txawj txhawv thiab txi txiv.

Cov neeg nplua nuj noj seem noj so, lawv noj mov tsis tas lawv coj mus ncuav tej taig pov tseg, lawv tsis nco qab khuv xim. Lawv tsis nco txog lub txiaj ntsim ntawm tej qoob loo, tsis nco txog neeg lub hws nrog, vim lawv tsis tau khwv. Lawv tsis xav txog tias : yog tsis muaj mov lawm, lawv yuav muab lawv tej nyiaj mus muas mov nyob qhov twg ? Lawv cia li noj thiab nqos lawv tej nyiaj txiag xwb puas tau ? Cov neeg pluag nyiaj tshaib yoo nqhis, mas ib lub mov muaj nqis rau lawv tshaj ib choj kub. Cov neeg nplua nuj saib ib lub mov poob tsis muaj nqis rau lawv, ces lawv xuas ko taw xuab. Cov neeg pluag nyiaj tshaib yoo nqhis, mas ib lub txhuv poob hauv av, lawv tseem xuas tes mus yawm kom tau, vim lawv saib ib lub txhuv muaj nqis dua tib neeg tej nyiaj kub.
Kom peb nco ntsoov tias : nyob hauv ntiaj teb no, tseem muaj ntau lub teb chaws thiab ntau haiv neeg uas lawv niaj hnub nyiaj tshaib yoo nqhis, lawv tsis muaj noj xws li peb. Thaum ib tug neeg twg poob rau txoj kev tshaib nqhis zoo li ntawd, mas nws thiaj yuav pom tias yam muaj nqis tshaj nyiaj kub yog dab tsi. Peb txhob luam thuam, peb txuag noj txuag haus thiab peb ua neeg xyuam xim, ces peb yuav pom thiab paub txog yam muaj nqis dua kub.