Zaj Nyeem Hnub Tim 2 Lub 3 Hlis Xyoo 2019

Zaj nyeem ib : Hauv phau ntawv Npes Xis Las, zaj 17 qib 1txog 15. Hais txog Tswv Ntuj pub kev txawj kev ntse rau neeg tias :
Huab Tais muab av luaj los tsim neeg, nws xa neeg rov mus ua av.
Huab Tais pub kom tib neeg nyob npaum no hnub npaum no xyoo, nws muab tas puas tsav yam nyob ntiaj teb rau neeg kav. Nws muab ib lub zog zoo li nws lub rau neeg, nws tsim neeg xws li nws tus duab. Huab Tais ua kom tas puas tsav yam ntshai neeg, kom neeg tswj tau me tsiaj me noog. 
Nws tsim neeg muaj ib lub ncauj ib tug plaig, ob lub qhov muag, ob lub pob ntseg, nws muab ib lub siab txawj xav rau neeg. 
Huab Tais tsim neeg txawj thiab ntse, nws pub kom neeg paub qhov phem qhov zoo. Nws kaj neeg lub siab kom neeg pom tias nws tej hauj lwm zoo, kom lawv cav txog nws lub npe ntshiab, kom lawv piav yam loj nws tau ua. Huab Tais pub kom neeg paub txuj, thiab nws muab Txoj Cai pub txoj sia rau lawv. 
Huab Tais nrog neeg cog ib co lus nyob mus li. Nws qhia neeg kom neeg paub nws Txoj Cai. 
Neeg qhov muag tau pom Huab Tais lub hwj chim loj. Neeg pob ntseg tau hnov Huab Tais lub suab muaj hwj chim. 
Huab Tais tau hais rau neeg tias : 'Nej ceev faj kom nej txhob ua nkhaus.' Huab Tais qhia Txoj Cai rau neeg kom lawv ua zoo rau cov nyob ze lawv. 
Neeg tej xub ke nyob ntawm Huab Tais xub ntiag mus li. Neeg tej xub ke zais tsis tau rau Huab Tais qhov muag.
Zaj nyeem ob : Nyob hauv Mas Kos ntawv Moo Zoo, zaj 10 qib 13 txog 16. Sau txog Yes Xus thiab cov me nyuam :
Luag coj ib co me nyuam tuaj rau Yes Xus kom Yes Xus kov lawv, tab sis cov thwj tim cem lawv hnyav. Yes Xus pom li ntawd, nws npau taws, nws hais rau lawv tias :
“Nej cia cov me nyuam tuaj cuag kuv, nej txhob txwv lawv. Yog cov neeg uas zoo li cov me nyuam no thiaj yuav tau Tswv Ntuj lub Ceeb Tsheej los ua lawv tug. 
Kuv hais tseeb rau nej : leej twg tsis txais Tswv Ntuj lub Ceeb Tsheej zoo li ib tug me nyuam, mas nws yuav mus tsis tau hauv Tswv Ntuj lub Ceeb Tsheej.” 
Ces Yes Xus puag cov me nyuam, nws tsa tes rau saum lawv, nws foom hmoov zoo rau lawv.