LEEJ NTUJ PLIG NTSHIAB TSA TSEV NYOB HAUV PEB

"Nej yuav sis nyiam sis hlub li kuv tau hlub nej, yog li peb yuav tsum sib nyiam sib hlub."
-Vaj Qhia Fas Ntshis Kus-
17/5/2020

Hnub tim 17 lub 5 hlis 2020 no yog Hnub Chiv Lis Piam 6 hauv lub Caij Hla, yog ib hnub peb yuav nco txog Huab Tais Tswv Ntuj txoj kev nyiam thiab txiaj ntsim ntawm Leej Ntuj Plig Ntshiab.
Vaj Qhia ntuas kom sawv daws zoo siab xyiv fab vim Leej Ntuj Plig Ntshiab tau txhawb peb kom coj lub neej raws li Ntawv Moo Zoo.
Nyob hauv Zam Ntawv Moo Zoo (Z 14:15-21), Vaj Qhia Fas Ntshis Kus tau muab nthuav ua 2 nqe lus : Ua raws Txoj Cai thiab Leej Ntuj Plig Ntshiab cog lus tseg.
Nyob hauv Huab Tais Yes Xus cov lus nws hais rau cov Thwj Tim, mas yog hais txog kev nyiam Huab Tais Yes Xus raws li Huab Tais Yes Xus tau hais tseg hauv pluas hmo kawg tias : Yog nej nyiam kuv, mas nej yuav coj raws kuv cov lus qhia. Tshwj xeeb tshaj mas yog : Tus muaj kuv cov lus qhia thiab nws coj raws kuv cov lus qhia, nws thiaj yog tus nyiam kuv.
Vaj Qhia hais tias cov lus ntawd yog Huab Tais Yes Xus thov kom peb nyiam nws thiab txaus siab taug Yes Xus txoj kev, qhov ntawd yog ua raws Leej Txiv siab.
“Dhau ntawd, Huab Tais Yes Xus tseem muab ib Txoj Cai tshiab rau peb : Nej yuav sis nyiam sis hlub li kuv tau hlub nej, yog li peb yuav tsum sib nyiam sib hlub.” Vaj Qhia hais li.
Huab Tais Yes Xus tsis tau hais tias ‘Hlub li kuv hlub koj,. Tiam sis Huab Tais Yes Xus hais tias ‘Sib nyiam sib hlub li kuv hlub koj’.
Vaj Qhia hais ntxiv tias Huab Tais Yes Xus txoj kev nyiam, mas nws tsis thov kom peb ua xws li nws. Tiam sis yog kom peb muab txoj kev nyiam coj los siv nyob hauv peb txoj sia.
Vaj Qhia nthuav tias vim Huab Tais Yes Xus xav pab nws cov Thwj Tim kom taug tau nws txoj kev, mas Huab Tais Yes Xus thiaj hais rau lawv tias nws yuav thov Leej Txiv kom xa ib tug nqes los nyob hauv lawv thiab muab lub tswv yim thoob tsib rau lawv. 
“Tus ntawd yog Leej Ntuj Plig Ntshiab”, Vaj Qhia hais “yog Tswv Ntuj txoj kev nyiam lub txiaj ntsim uas pub rau peb los txog niaj hnub no.”
“Yog Huab Tais Yes Xus txoj kev nyiam pub rau cov ntseeg txog nws thiab txais Cim Ntxuav hauv Leej Txiv thiab Leej Tub thiab Leej Ntuj Plig lub npe.”
“Yog tus Plig txhawb peb lub zog kom rhais ruam mus lawm tom ntej nyob hauv txoj kev iab kev khwv xws li Huab Tais Yes Xus txoj kev txom nyem.”
Vaj Qhia tseem hais tias yog peb ntseeg txog Leej Ntuj Plig Ntshiab, mas Leej Ntuj Plig Ntshiab yuav ua txoj hauj lwm nyob hauv peb, hloov peb lub siab kom qhib txais qhov tseeb thiab kev nyiam.
Vaj Qhia rov hais rau sawv daws tias nyob hauv peb txoj sia mas muaj ntau zaus peb ntsib xwv txheej loj thiab coj peb mus poob rau qhov txhaum, mas tsuas yog Leej Ntuj Plig Ntshiab thiaj yog tus pab kom peb txhob qaug thiab pab kom peb nkag siab Huab Tais Yes Xus cov ntsiab lus qhia : Yog nej nyiam kuv, mas nej yuav coj raws kuv cov lus qhia.

Vam txog : Vaticannews.va/en
Tus txhais : Txawj Tsav Meej Mom Lauj, Zoo Tswv Zov Yaj