KEV TSIS SIB HAUM XEEB HAUV CUAB YIM NEEJ MUAJ FEEM XYUAM RAU ME NYUAM TUS CUJ PWM.

Kev tsim txom me nyuam tsis hais ntaus, nplawm, cem, thuam los yog hais lus tsis zoo rau me nyuam mas yuav ua rau me nyuam muaj kev mob sab cev nqaij thiab sab ntsuj plig, 
Nyob rau zim txwv no, muaj ntau ntau yam ua tus qauv tsis zoo rau me nyuam yoog, xws li kev hais cov lus tsis zoo mloog, kev sib ceg, kev sib ntaus sib tua. Tej no peb pom nyob hauv TV, hauv Internet, hauv Social media thiab hauv cov yeeb yaj kiab. Dhau ntawd, me nyuam yuav yoog cov yam ntxwv tsis zoo ntawm nws cov phooj ywg thiab ntawm niam txiv.
Cuab yim neej yog thawj thawj qhov ua tus qauv rau me nyuam pom thiab yog thawj chaw me nyuam hlob tuaj. Me nyuam thiaj xyaum yoog raws niam txiv ua ntej lwm tus.
Yog li kev tsis sib haum xeeb ntawm niam thiab txiv thiaj yog ib yam tseem ceeb vim muaj ntaus zaus niam txiv sib ceg, sib ntaus los yog cem me tub me nyuam vim me nyuam ua tsis haum niam txiv siab. 
Thaum muaj tej xwm no lawm yuav ua rau me nyuam cim tseg cia hauv nruab siab. Ua rau me nyuam muaj dab tsi los nws tsis kam qhia tawm, nws zais siab, me nyuam xav tias nws tsis muaj nqis dab tsi. 
Yog li peb sawv daws thiaj yuav tsum sib koom tes txuag me nyuam kom loj tuaj lawv txhob coj tus cuj pwm phem. Peb yuav tsum txwv cov xwm tsis zoo rau me nyuam saib, peb yuav tsum tsim kev sib haum xeeb hauv cuab yim neej. peb yuav tsum nrog cov me nyuam sib tham kom muaj paus ntsis, txhob cem los siv dag zog ntaus me nyuam. Yuav qhia lawv yog thaum cov me nyuam ua tsis yog.