KEV NTSEEG NYOB KES NIAS TEB

Nyob hauv lub Cheeb Koom Txoos Nas Kus Lus nyob Kes Nias teb, ntau xyoo dhau los no lub Koom Haum OMI loj hlob thiab vam meej zuj zus. Tsis ntev los no muaj 3 lub tsev teev Ntuj txhab ntxiv thiab los txog tsaib no 2019, mas rov muaj dua ib lub tsev teev Ntuj tshiab nyob hauv lub Cheeb Koom Txoos Nas Kus Lus. Lub tsev teev Ntuj tshiab ntawd hu ua tsev teev Ntuj hwm Leej Ntshiab Yos Xes Las Mus Dias. Nyob thaj tsam ntawd tseem muaj 9 lub tsev teev Ntuj me me thiab. Tom qab kev xaiv tsa xyoo 2007 thiab 2008, mas cov neeg ntseeg raug kev kub ntxhov loj kawg, ces sawv daws khiav mus rau ub rau no. Qhov kawg, mas lub Cheeb Koom Txoos Nas Kus Lus thiaj tshuav cov neeg ntseeg tsis coob pes tsawg lawm. Cov neeg ntseeg nyob thaj tsam ntawd, feem coob lawv yog neeg liaj neeg teb thiab yog cov pluag txom nyem. Tsis tas li ntawd, cov neeg nyob hauv zos ib nrab lawv kuj teev lwm txoj kev teev hawm thiab. Cov OMI lub hom phiaj, mas yog tshaj Ntuj Lus rau cov neeg pluag txom nyem. Qhov no thiaj ua rau Tswv Qhia tso cai rau cov OMI mus tshaj Ntuj Lus nyob hauv lub Cheeb Koom Txoos Nas Kus Lus, kom tau pab lub Koom Txoos.