THOV NTUJ RAU COV NEEG KHAJ CAI TXOG FLOYD TXOJ KEV TUAG.

Cov Tswv Qhia As Mes Lis Kas sib koom thov Ntuj nyob Los Mas rau cov neeg khaj cai txog Floyd txoj kev tuag nyob As Mes Lis Kas teb. 
Tswv Qhia Kevin Farrell hais tias : cov neeg ntseeg yuav thov Ntuj pab kom cov neeg sib sau tawm tsam txawj cheem lawv lub siab thiab txawj xam pom txiaj ntsig ntawm lub teb chaws. Kev sib uv nyob ua ke kom sib haum xeeb, mas yog txoj kev ua kom sawv daws vam meej thiab nyob thaj yeeb. 
Tswv Qhia hais ntxiv tias : qhov uas sawv daws ua siab ntev thiab txawj sib uv nyob ua ke, mas yog kev muaj vaj huam sib luag thiab sawv daws tau nyob thaj yeeb sov siab tiag. 
Tswv Qhia Kevin Farrell hais cov lus no nyob hauv lub tsev teev Ntuj Leej Ntshiab Mab Liab uas yog pab neeg Sant Egidio tuaj sib koom nyob Los Mas, yog qhov chaw cov neeg ntseeg nyob thoob ntiaj teb nquag tuaj sib sau. Cov neeg tuaj sib sau teev Ntuj coob coob, mas yog xav thov kev ncaj ncees thiab kev nyob thaj yeeb rau cov tawm tsam nyob Los Mas thiab nyob As Mes Lis Kas teb. Cov neeg sib sau coob coob teev Ntuj ua ke li ntawd sib law 2 hnub lawm. Vaj Qhia Fas Ntshis Kus hais tias cov neeg tuaj sib sau coob coob teev Ntuj ua ke, mas yog lawv tab tom thov Ntuj pub rau Georg Floyd thiab tsoom pej xeem As Mes Lis Kas. 
Tswv Qhia Kevin Farrell hais tias : “Tam sim no tas ntiaj teb neeg tab tom ntsia ntsoov tias tsoom pej xeem As Mes Lis Kas muaj ib txhia ua ntxhov quav niab, ib txhia tab tom tu siab tsis paub xyov yuav ua cas. Vim yog kev sib cais ntawm cov haiv neeg tawv nqaij sib txawv tseem muaj nyob As Mes Lis Kas teb. Yog ib qho ua kom pom tias kev sib ntxub ntxaug ntawm cov haiv neeg tawv nqaij sib txawv ntau xyoo tag los, muaj qee yam kuj zoo lawm, tab sis muaj qee yam kuj tseem kub ntxhov li qub. Vim li ntawd, kev nyob ua ke sib haum xeeb ib tug txawj hlub ib tug thiaj yog qhov tseem ceeb thiab muaj nqis uas yuav sib txhawb ntxiv mus lawm yav tom ntej. Qhov chaw ntawm no, yog qhov chaw tsoom neeg ntseeg tuaj sib sau. 
Peb cov neeg ntseeg yuav ua tim khawv txog peb lub neej tshaj Ntuj Lus kom muaj tej yam tshiab tshwm sim tuaj. Txoj kev hlub uas Huab Tais Yes Xus muab rau peb, zoo li ib lub txiv txi zoo nkauj los ntawm txoj kev tuag thiab kev sawv rov qab los. Yuav cia lub txiv ntawd nyob nrog peb thiab ua hauj lwm rau peb saib tsis tau, tab sis yog tus piv txwv nyob hauv peb lub neej rau peb coj. Yog Huab Tais Yes Xus txoj kev thaj yeeb muaj nyob hauv peb siab tiag, mas yuav tsis muaj ib qho chaw seem rau peb los sib txeeb sib thuam. Peb yuav zoo siab txais tos lwm tus txoj kev xav thiab yuav tsis muaj kev sib caij tsuj.”