TSEV TEEV NTUJ NYOB SUAV TEB ROV QHIB

Txij lub 1 hlis xyoo no los, cov tsev teev Ntuj nyob Suav teb raug kaw tas nyob hauv txhua lub xeev, vim muaj tus kab mob Covid-19 sib kis. Hnub tim 7 lub 6 hli no, yog thawj hnub uas cov tsev teev Ntuj rov qab qhib. Tab sis tseem hwv Suav kom txhua lub tsev teev Ntuj yuav tsum muaj txoj cai tiv thaiv kev sib kis kab mob nruj nruj, kom txhob pub tus kab mob rov sib kis ntxiv. Cov tub tseem hwv uas yuav tuaj saib tsev teev Ntuj, mas yuav xub nug ua ntej thiab muaj ntawv zeem tseeb ntawm tseem hwv. Tseem hwv Suav tso cai, ces hnub tim 2 lub 6 hli no cov neeg ntseeg nyob txhua lub tsev teev Ntuj tau tu cov tsev teev Ntuj, yam li cheb ntxuav, tua tshuaj tiv thaiv kab mob, ntxhua tej ntaub pua rooj, yam twg uas ntxuav tau mas sau ntxuav huv si. Tab sis yog thawj lub lis piam xwb, ces tseem tsis tau muaj cov neeg ntseeg mus sib koom ua ke coob coob.