COV NTSEEG THOV KEV NCAJ NCEES RAU COV HAIV NEEG TAWV NQAIJ SIB TXAWV

George Floyd tsev neeg thiab nws cov phooj ywg tau ua nws lub ntees tuag nyob hauv lub nroog Houston, vim George Floyd raug cov tub ceev xwm As Mes Lis Kas xuas hauv caug tais caj dab tuag. Floyd txoj kev tuag, zoo yam li lub cub tawg kis thoob As Mes Lis Kas teb thiab kis yuav luag thoob txhua lub teb chaws. Sawv daws tawm tsam hais txog cov neeg tawv nqaij sib txawv thiab thov kom cov tseem hwv hloov txoj cai uas cov tub ceev xwm tau ua rau cov neeg As Fiv Kas thiab lwm cov haiv neeg tsawg uas nyob As Mes Lis Kas teb. Vaj Qhia Fas Ntshis Kus thiab cov neeg ntseeg nyob thoob ntiaj teb kuj tsis pom zoo txog Floyd txoj kev tuag thiab thov kom cov tseem hwv muab kev ncaj ncees rau Floyd. WCC thiab cov neeg ntseeg Kav Tos Liv thiab cov neeg ntseeg Plos Tes Taas muaj txoj cai hais txog cov neeg sib txawv ntawm cev nqaij daim tawv. Txiv Plig Los Lees hais tias kev hais cai ntawm cov neeg tawv nqaij sib txawv, mas nws yog tus sawv cev ntawm cov tsev teev Ntuj nyob thoob ntiaj teb. Yog yus paub txog neeg lub meej mom thiab neeg qhov muaj nqis uas Tswv Ntuj muab tsis hais haiv neeg twg kuj xij, yus yuav saib lawv muaj nqis thiab hwm lawv, tsis cais lawv, mas thiaj yog ib co neeg ntseeg tiag. Peb yuav ua cov hauj lwm uas tsim nyog ua nyob As Mes Lis Kas teb thiab nyob thoob ntiaj teb. Vim li ntawd Txiv Plig Los Lees thiaj qhia kom sawv daws pom txog kev raug ntau yam xwm txheej nyob hauv lub caij tus kab mov Covid-19 sib kis thiab teeb meem hais txog cov neeg tawv nqaij sib txawv. Cov neeg ntseeg yuav muab siab rau tiv thaiv thiab ua txhua yam hauj lwm pab neeg nyob As Mes Lis Kas teb thiab nyob hauv lwm cov teb chaws thoob ntiaj teb, kom cov neeg ntseeg nyob As Mes Lis Kas pom txog cov haiv neeg tej keeb kwm uas muaj los tau 400 xyoos lawm. Cov lwm tswj nyob txhua lub tsev teev Ntuj thoob ntiaj teb pom tias : cov neeg ntseeg thiab txhua lub tsev teev Ntuj nyob As Mes Lis Kas teb nrhiav kev ncaj ncees rau cov haiv neeg tawv nqaij sib txawv, mas yog ib qhov nyuaj uas tsis muaj kev khuv leej thiab tsis muaj ib qho dab tsi kiag. Txawm li ntawd tsis kav WCC kuj yuav soj ntsuam txog kev tawm tsam nyob As Mas Lis Kas teb hais txog cov neeg tawv nqaij sib txawv. Tsis hais nyob qhov twg kuj xij, cov neeg ntseeg yuav ua pov thawj vim sawv daws yog ib co ntseeg.