PAB CHEEM SUAV KEV QUAB YUAM HOOJ KOOS.

Cov tub pwm tsav coob leej hauv lub Leej Haum Kuj thov kom tus pwm tsav saib xyuas tib neeg kev ncaj ncees nyob hauv lub Leej Hauj Kuj muab siab rau ua cov hauj lwm los cheem cov tseem hwv Suav txoj kev quab yuam Hooj Koos, Xis Cias thiab Tis Npes. Vim Hooj Koos, Xis Cias thiab Tis Npes tau tawm tsam tiv cov tseem hwv Suav taij thov kev twj lij, thiab Hooj Koos taij kom cov tseem hwv Pej Ceeb tso txoj cai kav lawv nruj nruj. 
Kev sib tawm tsam ua rau Hooj Koos, Xis Cias thiab Tis Npes ntxhov quav niab. Cov teeb meem no lub Leej Haum Kuj tsis tau muab siab rau txog, vim yog teeb meem nyob Suav teb xwb, tsim nyog tseem hwv Suav ua tus daws. Tab sis coob leej tub pwm tsav hauv lub Leej Haum Kuj pom tias yog cia li no mus, mas kev tawm tsam tsuas muaj kub ntxhov xwb, tsis muaj qhov yuav nyob tiaj tus. Ces lawv thiaj tau taij thov kom tus pwm tsav saib xyuas tib neeg kev ncaj ncees nyob hauv lub Leej Haum Kuj tig los muab siab rau txog tib neeg kev ncaj ncees nyob hauv Suav teb. Vim tam sim no cov pej xeem uas tawm tsam nyob Hooj Koos thiab nyob Xis Cias ntau plhom leej rau kaw nyob hauv cov yeej tub zog thiab raug quab yuam. Yog zoo li tus Das Lais Las Mas hais tias yog ib txog kev tab tom cheb ntxuav tua cov haiv neeg tsawg kom tu noob nyob Tis Npes teb.