KEV NCHUAV NYIAJ NTAU KUB NYOB SUAV TEB

Lub zos Mam Liav (Maliao) hauv xeev Lej Sab (Leishan), Kim Tsawb (Guizhou) tau lub npe tias ‘Zos tsim npauj nyiag npauj kub’, vim cov Hmoob hauv lub zos no lawv ua lag luam nchuav nyiaj ntaus kub raws li cov laus ib txwm ua los.
Hmoob Suav kev nchuav nyiaj ua npauj nyiag npauj kub mas yog ib yam txuj ntawm Hmoob teej Hmoob tug uas txhua haiv neeg nyiam thiab qhuas kawg nkaus. Yog thaum ib tus nraug Hmoob Suav nyiam tus hluas nkauj twg mas nws yuav muab tej npauj nyiag npauj kub pub rau tus poj niam ntawd.
Nyob hauv Hmoob Suav rooj tshoob kev sib yuav, mas nkauj nyab yuav ua zam hnav tsoos tsuj tsoos npuag uas muaj npauj nyiag npauj kub hnyav li ntawm 20 tawm choj nyiaj (10 kg.) cov npauj nyiag npauj kub ntawd muaj xws li : kaus mom nyiaj, zuag nyiaj, hmuv nyiaj, paj nyiaj, qhws ntsej nyiaj, xauv nyiaj, saw nyiaj, hlab siv nyiaj, xauv yaj leej, phuam vaj nyiaj, tooj npab nyiag, tswb nyiaj thiab phiaj khawm caj dab nyiag.
Yog li xyoo 2006, tseem hwv Suav thiaj cim tseg cia hauv ntaub ntawv tias Hmoob cov npauj nyiag npauj kub yog yam muaj nqhis nyob hauv haiv neeg qub tes qub taw. 
Vim kev vam meej muaj tshuab nchuav nyiaj nchuav kub tawm los ntau, ua rau kev nchuav nyiaj ntaus kub yooj yim dua yav thaud. Ces tib neeg tig los siv cov npauj nyiag npauj kub tshuab nchuav lawm xwb. Tsis tas li, kev xuas tes nchuav nyiaj ib zaug no siv sij hawm ntev thiab tus nqe tes los tsis txaus muas noj muas haus; ua rau cov kws nchuav nyiaj ntaus kub tso lawv tej txuj ci pov tseg tig mus ua tub dag tub zog raws nroog loj tas lawm.
Phab Sim Xwm (Pan Shixue) los kuj yog ib tug kws nchuav nyiaj li hais los saud,  nws nqes saum roob tawm hauv zos Mam Liav mus ua zog nrhiav nyiaj rau nram nroog loj. Nws pom tias niaj xyoo mas nws rhais ruam mus deb tsev zuj zus.
“Kuv zoo li ib tus neeg nyob hauv plawv dej ntuj, kuv xav tias yuav tsum nrhiav kom pom ntug dej.” Phab Sim Xwm hais li.
Thaum xav tau li ntawd, nws thiaj txiav siab ua yam nws tsev neeg ib txwm ua los, yog nchuav nyiaj ua npauj nyiag npauj kub.
Xyoo 2008, Phab Sim Xwm thiaj sim muag npauj nyiag npauj kub nyob hauv tsev vas : Taobao. Muaj neeg tuaj qhov txhia chaw tuaj yuav nws cov npauj nyiag npauj kub. Nws pom tias tos nws cov npauj nyiag npauj kub muag tau ntaus los vim nws nchuav kom txawv Hmoob cov qub npauj thiab ntaus raws li tus yuav lub siab nyiam.
Xyoo 2018, tseem hwv pom txog yam muaj qab hau ntawm Hmoob cov npauj nyiag npauj kub, ces tseem hwv thiaj coj nyiaj tuaj pab txhim tsa tsev nchuav nyiaj ntaus kub hauv zos Mam Liav kom yog ib thaj tsam nchuav Hmoob cov npauj nyiag npauj kub.
Qhov xwm no ua rau cov hluas sawv daws rov qab tig los ua neej nyob hauv lawv lub zos. Phab Sim Xwm los kuj rov qab los nyob hauv nws qub tsev li lwm tus thiab.
Thaum tau kev pab ntawm tseem hwv li ntawd, cov Hmoob sawv daws thiaj sib pab nrhiav tswv yim kho lawv cov npauj nyiag npauj kub kom zoo nkauj thiab ntxim siab.
Ziag no nyob hauv zos Mam Liav mas muaj 14 lub tuam tsev nchuav npauj nyiag npauj kub, muaj chaw cog qoob loo 7 thaj tsam qhib tos txais cov qhua tuaj tsham lawv lub zos.
Lub zos Mam Liav rov qab muaj sia tuaj, muaj kev vam meej, muaj neeg mus mus los los tas niaj tas xyoo. Sawv daws dim ntawm kev txom nyem los ua lub neej tsis tshaib nqhis.
Ntawm Phab Sim Xwm ntiag tug los, nyob rau tsaib no xwb twb muaj neeg tuaj saib nws lub tuam tsev nchuav npauj txog li ntawm ib txhiab leej neeg, nws muag cov npauj tau ntau dua ob puas txhiab nyiaj suav. Nws hais tias : “Kuv yuav txhawb nqa kom kuv txoj lag luam no loj hlob mus dua no, thiab kuv yuav ua tus piv txwv rau cov hluas phaum tom qab. Peb yuav sib pab tsim kev vam meej hauv peb cov zej zos nyob raws ntug nroog li no mus lawm tom ntej”

Nyeem lus Aas Kiv tau nram no : http://global.chinadaily.com.cn/a/202005/28/WS5ecf1670a310a8b2411590c8.html