TSEEM HWV NYAB LAJ MUAB TUS NEEG XYAV MOO TXOG TXOJ CAI KOOM TSHAJ KAW.

Lub tuam tsev txiav txim nyob Has Nais tau txiav txim muab ib tug txiv neej Nyab Laj kaw 8 xyoo hauv nkuaj, vim nws xyav moo txog tseem hwv txoj cai koom tshaj nyob hauv facebook. Tus txiv neej ntawd raug ntes hnub tim 23 lub 9 hlis tsaib no. Tus kws lij choj Nguyen hais tias ; cov lus tus txiv neej ntawd xyav mas yog ib co lus hnyav thiab yog ib txog kev txiav txim nyuab kawg, vim nws yog kev sib xyav ntawm tej pab neeg nyob hauv Online xwb. Txawm li ntawd kuj xij, qhov no yog ib qho qhia rau ib zeej tsoom paub txog tseem hwv Nyab Laj txoj kev cheb ntxuav cov neeg tiv tseem hwv nyob hauv lub teb chaws. Nyob hauv tus txiv neej uas raug ntes ntawd li facebook, mas muaj 10,000 tus neeg soj nraim nws thiab nws tau hais ntau yam txog cov tseem hwv, yam li kev txeeb tsoom pej xeem tej av los sis tej liaj teb thiab hais txog cov tub tseev tsim uas raug ntes kawg. Tus txiv neej ntawd kuj tau hais ib co lus txhawb nqa tsoom pej xeem Hooj Koos uas lawv tiv tseem hwv Suav txoj cai thiab nws qhuas txog kev hloov lub teb chaws ntawm Ves Nes Xes Las teb. Lub xov tooj cua Radio FreeAsia (RFA) hais tias : ib ntus no muaj cov neeg xyav tseem hwv txoj cai nyob hauv Online ntau kawg. Nyab Laj teb muaj tsoom pej xeem tag nrho 92 plhom leej. Nyob hauv 92 plhom leej, mas muaj 55 plhom leej siv facebook. Kev siv facebook thiab xyav tseem hwv txoj cai nyob hauv Online, mas nws yog ib txog kev twj lij thiab yoom yim rau sawv daws siv thiab tawm tswv yim. Ces qhov tseem hwv yuav ntes thiab cheem sawv daws txoj kev xav thiab kev pom zoo nyob hauv Online kuj tsis yooj yim. Leej twg xyav moo txog txoj cai koom tshaj, mas yuav tsum raug ntes raug kaw xwb. Tshwj zias cov tub xov xwm, cov tub soj ntsuam huab cua thiab tseem hwv cov neeg xwb, thiaj muaj cai hais txog tseem hwv txoj cai koom tshaj.