VAJ QHIA FOOM HMOOV ZOO RAU 6,000 TXOJ SAW MAB LIAB NYOB XIS LIAS TEB

Ua ntej yuav thov Ntuj, Ntuj tus Tshiab xa lus tias : hmo Huab Tais Yes Xus yug los, Niam Mab Liab tau txais txiaj ntsim nce mus saum ntuj tsis hais lub cev los yog tus ntsuj plig. Vaj Qhia Fas Ntshis Kus tau hais ib co lus ua kev tu siab txog 200 tus neeg Is Ntias uas lawv tuag los ntawm khaub lig cua. Vaj Qhia hais tias : “Txiv thov Ntuj rau cov neeg tuag, rau cov neeg khiav ua neeg thoj nam, rau cov yim neeg uas tsis muaj vaj tsev nyob. Thov Tswv Ntuj pub lub zog pab txhawb lawv thiab pab txhawb cov neeg uas mus cawm cov raug xwv txheej.”

Vaj Qhia kuj nco txog tsoom pej xeem Xis Lias uas lawv raug xwv txheej sib ntaus sib tua, lawv lub teb chaws muaj tsov rog yam tsis tu ncua. Vaj Qhia hais tias : “Txiv thov kom nej sawv daws nrog Txiv koom siab tam sim no, Txiv tab tom thov Ntuj foom hmoov zoo rau ntau txhiab txoj saw Mab Liab, kom tau coj mus faib rau peb cov neeg ntseeg nyob Xis Lias teb. ‘Yog lub Koom Haum pab cov neeg txom nyem ntawm lub Koom Txoos, lawv tau muab 6,000 txoj saw Mab Liab uas yog cov Leej Phauj Khas Mes Lais ua nyob Npes Les Hes. Peb hais zaj saw Mab Liab kom tau pab daws teeb meem kev kub ntxhov nyob As Xias Nras thiab nyob thoob ntiaj teb. Vaj Qhia rov nco txog hmo Yes Xus yug los. Nco txog Niam Mab Liab tau txais txiaj ntsim nce mus saum ntuj tsis hais lub cev los yog ntsuj plig.” Vaj Qhia taw lub ntsiab mus rau Niam Mab Liab txoj kev xaiv Tswv Ntuj, nws tsis xaiv lub neej nplua nuj lom zem ib me ntsis xwb ploj mus lawm, vim tej yam ntawd tsis paub puv neeg lub siab. Vaj Qhia hais tias : “Nyob hauv peb lub neej, peb yuav tsum txawj xaiv tias yam twg yog yam muaj nqis thiab tseem ceeb rau peb. Li ntawd, mas Niam Mab Liab yuav tsum plam tej yam me me, tej yam uas neeg lub siab ntshaw mus. Niam Mab Liab ua li ntawd, kom tau qhia peb tias : qhov yuav ua kom peb lub neej muaj nqis, yog Tswv Ntuj. Vim Tswv Ntuj tib leeg thiaj yog qhov muaj nqis thiab tseem ceeb rau peb, ces peb yuav tsum xaiv Tswv Ntuj uas yog qhov tseem ceeb thiab muaj nqis tshaj. Peb txhob tso peb lub siab qaug rau tej yam me me nyob ntiaj teb no uas tsis muaj nuj nqis dab tsi. Xws li kev xam khib, kev cib nyeej, kev sib txeeb ua tus loj, sib txeeb yam zoo, sib txeeb tej yam uas tsis tsim nyog, los sis tej yam toob xib uas peb nkim dag ua si.

Lub caij no Vaj Qhia kheev kheev siv sij hawm so nyob hauv tsev li 2-3 hnub nyob hauv lub vaj loog Nkas Dos Fos (Gandalfol), vim nyob ntawd txias dua nyob Los Mas. Txawm li cas kuj xij, Vaj Qhia yeej yuav tsum nyob txawm hauv lub tuam ceeb Vas Tis Kas mus li. Nyob Vas Tis Kas nruab hnub tshav ntuj kub heev, tej kev tsheb twb yuav luag tsis muaj neeg taug.