QIB XOV TOOJ CUA ONLINE THAWJ ZAUG NYOB PAS KIS TAAS TEB.

Hnub tim 25 lub 7 hli tag los yog thawj zaug uas cov neeg ntseeg nyob Pas Kis Taas teb qhib kom muaj xov tooj cua qhia kev ntseeg nyob Online. Tab sis sob lus yog tshaj tawm nyob hauv xov tooj cua Radio Veritas Asia (RVA) uas xa tawm nyob Fis Lis Pees teb. Kev tshaj xov tooj cua online, mas tshaj tawm txhua txhua hnub 6 thiab ib zaug yog 20 feeb. Tsis tas li ntawd, kuj muaj tso nyob hauv YouTube yog thawj zaug thiab. 
Tus Txiv Plig Qaiser Feroz hais tias : lawv lub hom phiaj uas qhib xov tooj cua Online, yog xav tshaj Tswv Ntuj Lo Lus rau ib zeej tsoom neeg thiab ua kom cov neeg ntseeg sib koom siab ua ib pawg. Tsis tas li ntawd, lawv tseem yuav txhawb nqa tej me nyuam txoj kev kawm thiab ua kom cov neeg ntseeg yog ib pab neeg tseem ceeb nyob hauv lub teb chaws. Cov lus tshaj tawm nyob Online, mas yuav tsis hais txog kev tseev tsim ntawm lub teb chaws thiab kev lag luam. 
Radio Veritas Asia yog qhov chaw cov Tswv Qhia nyob As Xias teb sib sau sab laj. Feem ntau yog cov neeg ntseeg nyob Pas Kis Taas, nyob Is Ntias thiab cov teb chaws nyob As Xias sab hnub poob mloog lawv cov sob lus nyob hauv Online. Nyob Pas Kis Taas teb, cov tseem hwv txwv hais txog kev tshaj lus hauv xov tooj cua ntawm cov neeg ntseeg thiab cov Mawv Xis Lim, ces lawv thiaj vam txog Radio Veritas Asia ua qhov chaw pab lawv xa lub Moo Zoo. 
Xyoo 2016, cov tseem hwv Pas Kis Taas tau muab cov neeg ntseeg lub tshaj xyam qhia kev ntseeg kaw, tsis pub tshaj lus hais txog kev teev hawm thiab tsis pub txais cov xyam qhia kev ntseeg tuaj ntawm lwm teb chaws tuaj. Vim li ntawd, cov neeg ntseeg thiaj hloov mus tshaj lus nyob hauv Online thiab YouTube. Tab sis kev Online txhua yam nyob Pas Kis Taas teb, mas tseem hwv muaj cov neeg soj ntsuam tsis pub hais txog kev tseev tsim thiab cov tub rog. Txiv Plig Qaiser Feroz thiab cov sib pab nrhiav cov zaj tau taij thov kom cov tseem hwv tso lus rau lawv tau kev tshaj lus nyob Online, ces txij lub 3 hlis los uas yog lub caij kaw teb chaws ntawm tus kab mob Covid-19, cov neeg mloog lawv sob lus nyob hauv Online nce tuaj li 15 feem pua.