IB NKAWM NIAM TXIV NYAB LAJ UA TSWV NTUJ TSAUG.

Txiv Plig Joseph Tran Huu Khoi hais tias Hoang Anh thiab Thuy nkawd muaj ib nkawg me nyuam ntxaib. Tab sis nkawd yug tau 2 tug me nyuam ntxaib sib lo ua ke. Tom qab cov kws kho mob phais thiab muab ob tug me nyuam sib faib cev tag, mas 2 tug me nyuam kuj tsis muaj li cas. Qhov no yog Tswv Ntuj lub txiaj ntsim uas pub rau nkawd thiab pov hwm nkawd 2 tug me nyuam. 
2 niam txiv Hoang hais tias : nkawd 2 tug me nyuam ntxaib sib lo ua ke muaj 13 lub hlis thiab hnyav 15 kg. Hnub tim 15 lub 7 hli tag los, cov kws kho mob li 100 leej tau muab 2 tug me nyuam phais sib faib, lawv siv sij hawm 14 teev los ua cov hauj lwm ntawd. Tom qab muab 2 tug me nyuam phais sib faib tag, mas 2 tug me nyuam kuj ua pa xwm yeem thiab tsis muaj dab tsi txawv txav. Tab sis 2 tug me nyuam yuav tsum raug nyob hauv tsev kho mob rau cov kws kho mob saib xyuas ib ntus. Hoang nkawd 2 niam txiv niaj hnub mus saib 2 tug me nyuam thiab nrog 2 tug me nyuam nyob. 
Nkawd hais tias : qhov uas ua kom 2 tug me nyuam nyob tau luag ntxhi, mas yog vim Tswv Ntuj lub txiaj ntsim thiab niam txiv txoj kev hlub. 
Nkawd tso siab rau Tswv Ntuj thiab ua Tswv Ntuj tsaug uas muaj Tswv Ntuj ua tus coj nkawd txoj hau kev. Ua ntej cov kws kho mob yuav coj 2 tug me nyuam mus phais sib faib cev, mas Hoang tau tuav 2 tug me nyuam tes thiab ua Ntoo Cuam lub Cim rau 2 tug me nyuam hauv pliaj. Tas lawv sawv daws tso siab rau tswv Ntuj thiab muab 2 tug me nyuam txoj sia tso rau hauv Tswv Ntuj xib tes. Txog qhov kawg, mas Hoang nkawd 2 tug me nyuam kuj phais sib faib cev thiab nyob muaj zog khov kho. Thaum cov kws kho mob tab tom phais 2 tug me nyuam, mas Hoang nkawd 2 niam txiv thiab cov neeg txheeb ze thov Ntuj tas zog pab. 
Thuy yog tus txiv, nws yog ib tug neeg ntseeg Kav Tos Liv. Thuy thiab Hoang nkawd sib yuav xyoo 2017. Thaum nkawd xeeb tub mas nkawd poob siab, vim cov kws kho mob hais tias nkawd tus me nyuam nyob hauv plab muaj teeb meem. Muaj coob leej neeg kom nkawd muab plab me nyuam ntaus pov tseg, yog tias muaj teeb meem li cov kws kho mob hais. Tab sis vim Thuy nkawd yog neeg ntseeg, ces nkawd ua ib siab tsis nchuav me nyuam. Txawm tias tus me nyuam nyob hauv plab yug los yuav zoo li cas kuj xij, nkawd zoo siab txais thiab yuav tu kom loj hlob. Nkawd rau siab thov Ntuj tas zog thiab tsis ntaus siab yau, vim tus me nyuam uas xeeb nyob hauv plab yog Tswv Ntuj lub txiaj ntsim uas pub rau nkawd. 
Txiv Plig Joseph Tran Huu Khoi zoo siab thiab muab 48 plhom Doos (2,000 USD) pub ua paj tshab rau nkawd. Thiab cov neeg ntseeg kuj sib pab nyiaj rau nkawd tu 2 tug me nyuam kom loj hlob. Thuy thiab Hoang nkawd lub tsev yog nyob hauv lub tuam ceeb Hom Cis Mees.