LUB KOOM TXOOS KAV TOS LIV NYOB ZIS PEES TEB NPAJ TOS TXAIS VAJ QHIA FAS NTSHIS KUS

Vaj Qhia Fas Ntshis Kus npaj mus tsham Zis Pees teb rau hnub tim 23 – 26 lub 11 hlis xyoo no. Zaum no yog zaum 2 uas ib tug Vaj Qhia ntawm Vas Tis Kas yuav mus tsham Zis Pees teb. Thawj tug Vaj Qhia uas mus tsham Zis Pees teb, yog Vaj Qhia Zam Paj Lug Ob, xyoo 1981. Lub hom phiaj ntawm kev mus tsham Zis Pees teb zaum no, yog kev sib hwm thiab saib txhua tus neeg muaj nqis. Yog ib lo lus los ntawm kev thov Ntuj sib koom siab xyoo 2015. Vaj Qhia Fas Ntshis Kus yuav mus tsham lub toj ntxas cov tim khawv Zis Pees thiab lub vaj lom zem ua ntej yuav ua thaj txi Ntuj rau hnub tim 24 lub 11 hlis. Tom qab ua thaj txi Ntuj tas, mas yuav mus tsham lub nroog His Los Sib Mas thiab lub tuam ceeb Tos Kis Yaus. Vaj Qhia yuav ua thaj txi Ntuj nyob hauv ib lub tuam tsev uas ntim tau 42,000 tus neeg. Vaj Qhia yuas ntsib coob leej neeg, yam li cov neeg raug Nus Khias (Nuclear Bomb), cov raug Xws Nas Mib, cov tub kawm ntawv, cov tub ntxhais hluas thiab cov tseem hwv Zis Pees.

Chiv keeb lub Koom Txoos nyob Zis Pees teb.

Lub Koom Txoos Kav Tos Liv pib muaj nyob Zis Pees teb yogh hnub tim 15 lub 8 hli xyoo 1549, yog thaum Leej Ntshiab Fas Ntshis As Xis Xis uas zwm rau lub Koom Haum Yes Xus Is tau tuaj txog lub nroog Khos Kas Sib Mas, thiab nws nyob ntawd tau 2 xyoos ntau. Ces nws tsim ntau yam nyob ntawd, thiaj pib muaj nws tej phooj ywg thiab muaj cov neeg ntseeg tuaj. Lub Koom Haum los yog pab Txiv Plig Yes Xus Is, yog raug xaiv los ua tus sawv cev pab saib xyuas txhua yam hauj lwm, yam li qhia kev ntseeg, teev Ntuj ua ke, saib xyuas cov neeg pluag txom nyem thiab cov neeg muaj mob. Tom qab uas cov Txiv Plig nyob hauv lub Koom Haum Yes Xus Is raug tua tuag thiab raug ntiab tawm teb chaws, mas tshuav cov txwj laus tuav txoj kev ntseeg mus txog thaum Zis Pees teb nyob thaj yeeb thiab tsis raug quab yuam. Xyoo 1587, Hais Des Yos Sis uas yog tus kav Zis Pees teb lub caij ntawd, tau muaj txoj cai txwv tsis pub cov neeg ntseeg nyob Zis Pees teb nrog lwm cov tub tshaj Ntuj Lus nyob Aws Los Pas sib fim. Hnub tim 5 lub 2 hlis xyoo 1597, cov tseem hwv Zis Pees tau hiam cov neeg ntseeg thiab muab 26 tus neeg ntseeg tua ntsia nyob saum ntoo cuam.

Xyoo 1693, tseem hwv Zis Pees kaw teb chaws thiab hiam cov neeg ntseeg nruj nruj.  Thaum ntawd nyob Zis Pees teb twb muaj cov neeg ntseeg 300 txhiab leej lawm.