TEEB MEEM THIAB KEV NYUAJ SIAB

Teeb meem thiab kev nyuab siab muaj nyob hauv peb txhua leej txhua tus tsis hais cov nkawm niam txiv kuj muaj tas mus li. Vim li cas muaj qee leej thiaj ntsib teeb meem kev nyuaj tas mus li, ua rau lub neej tsis vam meej thiab thaub qab, zoo li muaj ib tug dab txhob txwm ua kom ntsib teeb meem tas mus li thiab lub neej poob qib zuj zus. Muaj qee leej tau ntsib teeb meem kub ntxhov hauv lub neej ntau zaus thiab ua dab tsi los tsis tiav, txhua yam nws ntsib ua kom nws paub meej thiab to taub txog teeb meem kev kub ntxhov, ces yog ib txog kev qhia kom nws lub hom phiaj tiav kuj muaj. Nws sib txawv li cas hais txog ib tug neeg lub neej mus tsis tau thiab lwm tus neeg lub neej mus tau zoo thiab mus tau deb. Peb sawv daws yeej ntsib teeb meem kev nyuab siab ib yam. Li ntawd, peb yuav rov los soj ntsuam nyob hauv 4 yam no seb peb yog nyob rau nqe lus twg. (1) Tsis muaj kev nyuab siab, tsis muaj teeb meem kub ntxhov dab tsi. (2) Tsis khuam siab dab tsi, tab sis muaj teeb meem. (3) muaj teeb meem, muaj kev nyuab siab. (4) Tsis muaj teeb meem, tab sis muaj kev nyuab siab. (1) Tsis muaj kev nyuab siab, tsis muaj teeb meem kub ntxhov. Neeg feem coob xav kom tau nyob hauv nqe ib no xwb, vim ua rau yus nyob tau yam kaj siab lug tsis kub ntxhov dab tsi. Yuav ua dab tsi los kaj siab lug thiab ua mus tau zoo. Ua dab tsi los ua tiav yam yus tsis khwv tsis sab hlo li. Ib yam li tej laus hais tias : xav dab tsi tau dab tsi, ua yam twg los ua tau yam ntawd. Nqe 1 no neeg kheev kheev ntsia tsis pom thiab hla dhau mus, vim sawv daws xav tias yog ib yam xwm yeem uas niaj hnub pom xwb. (2) Tsis muaj kev khuam siab dab tsi, tab sis muaj teeb meem. Cov neeg nyob hauv nqe no, kheev kheev tsim teeb meem kub ntxhov thiab daws teeb meem tas mus li. Nws nyiam ua kom tej yam me me rais los ua teeb meem loj, yam twg nws xav, mas nws muab los ua teeb meem. Niaj hnub nws xav txog tej yam qub qub tag los, thiab muab rov los hais kom sawv ua teeb meem, ces nyob hauv nws lub neej zoo li daws teeb meem nkaus xwb. (3) Muaj teeb meem thiab muaj kev nyuab siab. Peb ua neeg nyob hauv lub ntiaj teb no, tsis hais poj niam los txiv neej, hnub nyoog ntau thiab tsawg, haiv neeg dab tsi kuj xij, txhua tus yeej muaj teeb meem thiab tau ntsib dua kev nyuab siab los lawm. Txhua yam kev nyuab siab thiab teeb meem uas peb tau ntsib nws sib txawv, ces ua kom neeg sib txawv thiab vim nyias muaj nyias kev xav. Thaum yus ntsib teeb meem thawj zaug, mas yus kheev kheev muab coj los xyaw yus txoj kev xav. Vim yus xav tias yam teeb meem yus ntsib yog ib qho tav yus txoj kev xav zoo zoo, ua kom yus ntaus siab yau thiab tsis muaj siab ua yam yus xav kom tiav raws lub hom phiaj. Qee leej siv sij hawm nyob ntau ntau nrog txhua yam teeb meem, qee leej kuj siv sij hawm tsawg nyob nrog tej teeb meem uas tshwm sim, vim nws tab tom daws yam teeb meem ntawd. (4) Tsis muaj teeb meem, tab sis muaj kev nyuab siab. Cov neeg uas nyob rau nqe lus no, nws muaj 2 lub ntsiab lus. Thawj lub ntsiab lus yog nws tsis muaj teeb meem dab tsi, tab sis nws txhob txwm ua li tus neeg ntsib teeb meem muaj kev nyuab siab. Tej yam kev xav me me uas nws zam dhau, tab sis nws muab coj los ua teeb meem loj nyob hauv nws lub neej. Lub ntsiab lus 2, tsis muaj teeb meem, yog nws muaj cuab kav daws teeb meem. Txawm nws ntsib teeb meem li cas, tsis kav nws muaj peev xwm daws. Ces yam teeb meem nws daws ntawd ua kev nyuab siab ntxhov rau nws. Nws yim daws yim ntxhov, yim xav yim tsaus ntuj. Txhais tias tsaus ntuj nti ntsia tsis pom qhov twg. Yog tias thaum yus ntsib teeb meem thiab yus txawj daws, mas yus yuav ua neeg nyob hauv nqe ib thiab yus kaj siab lug. Ntsib teeb meem dab tsi, yus tseem xav tias puas muaj tej yam teeb meem loj dua no. Vim yus lub siab npaj txhij yuav daws txhua yam teeb meem thiab kev nyuab siab.