KEV TSIS NCAJ NCEES THIAB KEV QUAB YUAM TIB NEEG.

Tam sim no hais txog kev quab yuam tib neeg thiab tsis muaj kev ncaj ncees nyob hauv tej pab pawg neeg, mas yog ib qho ua rau ib tsoom neeg nyob hauv ntau lub teb chaws tsis tau nyob thaj yeeb thiab muaj kev ntshai. Nyob hauv tej lub teb chaws muaj kev quab yuam tej me nyuam tub mus ua tub rog thiab muaj neeg nyiag tej me nyuam ntxhais coj mus muag. Kev ua li ntawd, mas yog txiav tej me nyuam lub neej thiab tab meeg tua neeg. Txhua yam kev kub ntxhov no yog tshwm sim los ntawm kev tseev tsim thiab cov nom tswv kav teb chaws. Tej kev tsis ncaj ncees thiab quab yuam neeg no muaj nyob hauv 85 lub teb chaws nyob thoob ntiaj teb. Cov neeg uas raug cov teeeb meem ntawd yog leej twg ? Yog tus raug ntes los sis tus raug quab yuam. Tus neeg raug ntes mus muag, mas nws tsis paub tias tag kis nws lub neej yuav xaus rau qhov zoo los qhov phem. Ces txoj kev ntshai muaj nyob hauv nws nruab siab mus ib sim, thiab nws tsev neeg yuav tsis paub txog nws li. 
Muaj qee leej raug ntes coj mus muag lawm, tab sis nws tsev neeg tseem cia siab tias nws mus ua ib txoj hauj lwm tseem ceeb, ces lawv niaj hnub tos nws. Cov neeg tos, mas lawv tos yam muaj kev cia siab. Tab sis tus raug ntes mus muag, mas nws tsis muaj kev cia siab txog nws lub neej. Peb sim xav seb : yog tus neeg raug ntes los sis raug quab yuam ntawd, nws yog ib tug txiv tsev los sis tus yug ib tse neeg. Yog tsis muaj tus neeg ntawd lawm, ib tsev neeg yuav nyob li cas. Vim li no, hais txog kev tsis ncaj ncees thiab quab yuam tib neeg nyob hauv txhua lub teb chaws thiaj yog ib yam teeb meem loj kawg. Peb sawv daws yuav tsum koom tes nrog cov tseem hwv nyob hauv peb lub teb chaws tiv thaiv txog cov teeb meem no.