CHEEB KOOM TXOOS HANOI PIB NTHUAV KEV TSHAJ NTUJ LUS DAV ZUJ ZUS.

Lub Cheeb Koom Txoos nyob Hanoi pib txhim ib lub tuam tsev loj qhia kev ntseeg rau cov neeg ntseeg Kav Tos Liv nyob Nyab Laj teb. Tswv Qhia Yos Xes Thias (Thien) nyob Hanoi tau ua ib co kab ke qhib kev txhim tsa lub tsev ntawd rau hnub tim 5 lub 8 hli dhau los no. Lub tsev tuam tshiab no, yog ua raws li cov neeg ntseeg taij thov thiab tsuas yog ib lub tsev qhia kev ntseeg tam sim thiab siv rau yav tom ntej. 
Tswv Qhia Thias tau ua Tswv Qhia kav lub Cheeb Koom Txoos Hanoi txij xyoo 2018 los. Tswv Qhia Thias hais tias : “Lub tsev qhia kev ntseeg uas txhim tshiab, yog ib lub cim ntawm neeg tus ntsuj plig thiab yog Tswv Ntuj lub chaw nyob ntawm cov neeg ntseeg.”
Thov kom sawv daws saib kev txhawb nqa neeg tus ntsuj plig yog qhov tseem ceeb nyob hauv lub Koom Txoos thiab sawv daws sib koom siab koom tes, kom txoj kev sib nyiam sib hlub txhawv tuaj. Ces sawv daws thiaj yuav xa tau Tswv Ntuj Lo Lus mus txog rau lwm leej lwm tus. 
Tam sim no Tswv Qhia Thias hnub nyoog muaj 60 xyoo lawm. Nws hais tias lub tsev txhim tshiab no muaj 3 qhov chaw ruaj khov, yam li yog cov neeg ntseeg qhov chaw tso siab, yog Tswv Ntuj txoj kev khuv leej thiab yog tsoom neeg ntseeg nyob hauv zej zog txoj kev hlub. Sawv daws yuav muab lub tsev no ua qhov chaw cuab zog kom muaj lub siab zoo txawj hlub luag tej. 
Lub tsev tshiab no muaj 8 txheej siab thiab muaj 2 txheej nyob hauv qab npoo av. Lub tsev no yuav ua qhov chaw nruab nrab ntawm kev sib sau kawm kev ntseeg thiab siv ua kev tshaj Ntuj Lus. Muaj ib kem tsev txaus tos txais 300 tus neeg, muaj ib kem tsev teev Ntuj uas muaj 400 lub rooj zaum. Xav tias lub tuam tsev tshiab no yuav txhim tiav rau 2 xyoos tom ntej no. Lub Cheeb Koom Txoos Hanoi pib muaj txij xyoo 1679 los. Tam sim no cov neeg ntseeg nyob Hanoi thiab 4 lub xeev nyob sib npuas muaj li ntawm 320,000 leej. Muaj cov Txiv Plig thiab cov Leej Phauj 178 leej tshaj Ntuj Lus nyob hauv 161 lub zos.