TSEEM HWV NYOB LAJ TSO CAI TSHAJ NTUJ LUS NYOB HAUV HOOS HUAS.

Hnub tim 21 lub 8 hli 2020 no, lub xeev Lai Chau tau txais kev tso cai los ntawm cov tseem hwv kheev lub Cheeb Koom Txoos Hung Hoa uas nyob hauv lub xeev Lai Chau tshaj Ntuj Lus raug tseem hwv txoj cai. Cov tseem hwv tso lus rau Txiv Plig Yos Xes Vas Nis (Joseph Nguyen Van Ninh) uas nws muaj hnub nyoog 49 xyoos, muaj cai tshaj Ntuj Lus rau cov neeg ntseeg 2,791 leeg nyob hauv ntau lus zos, nyob hauv lub Cheeb Koom Txoos Hung Hoa. Cov neeg ntseeg muaj cai sib sau teev Ntuj nyob hauv cov tsev teev Ntuj tau lawm. Thiab cov neeg ntseeg kuj thov cov tseem hwv kom pub lawv teev Ntuj nyob hauv tej lub xeev uas yav tag los cov tseem hwv tsis tso cai. 
Txiv Plig Pob Zeb Binh uas yog tus thawj ntawm kev tshaj Ntuj Lus nyob Lau Cai thiab Lai Chau hais tias : kev tso cai no yog ib qho zoo uas cov neeg ntseeg nyob hauv ntau thaj tsam tos ntshis los tau ntau caum xyoo. 
Txig Plig Pob Zeb Binh yog tus tshaj Ntuj Lus nyob hauv lub Cheeb Koom Txoos txij xyoo 2006 txog xyoo 2016, nws hais tias : xyoo 1966 thiaj pib muaj cov neeg ntseeg khiav ntawm ntau lub zos los sib sau nyob ua ke. Lawv ib txwm thov kom cov tseem hwv tso lus rau lawv tau kev teev Ntuj. 
Lub xeev Lai Chau muaj 20 tawm lub zos ntseeg Kav Tos Liv uas ib feem yog cov Hmoob. Yav tag los lawv tsis tau kev sib sau teev Ntuj, ces lawv sib sau teev Ntuj nyob hauv tej yim neeg uas lawv muaj vaj tse dav zog. 
Txhua txhua xyoo cov Txiv Plig yuav mus tsham cov neeg ntseeg, mas yuav xub tau thov ntawv tso cai ntawm cov tseem hwv. Lawv yuav cev cov neeg ntseeg cov npe tias cov neeg ntseeg muaj tsawg yim rau cov tseem hwv paub, thiab tas lub caij tus Txiv Plig nyob hauv cov zos neeg ntseeg, mas muaj tub ceev xwm soj ntsuam nruj kawg mus txog lub caij cov Txiv Plig tawm hauv lub zos mus lawm. 
Txiv Plig Yos Xes Van Ninh thov kom cov neeg ntseeg Kav Tos Liv ua lub siab ncaj ncees nyob hauv txoj kev tshaj Ntuj Lus thiab nyob hauv lub neej ua neeg ntseeg. Nyob hauv lub caij uas muaj tus kab mob Covid-19 sib kis no, thov kom cov neeg ntseeg nquag teev Ntuj thiab thov Ntuj pab sawv daws.