COV ME NYUAM 1 FEEM 3 NYOB NTIAJ TEB YUAV TSIS TAU TXAIS KEV KAWM.

Tam sim no muaj cov me nyuam yaus uas tab tom kawm ntawv li ntawm 463 plhom leej uas tsis tsis tau kev kawm ntawv nyob hauv tej tsev kawm ntawv, yog vim tus kab mob Covid-19. Cov me nyuam ntawd feem coob yog nyob hauv xeev ntuj As Fiv Kas thiab nyob As Xias toob fab naj. 
Cov me nyuam 463 plhom leej ntawd yog 1 feem 3 ntawm tas cov me nyuam nyob thoob ntiaj teb. Yog yuav xam tas cov me nyuam kawm ntawv nyob thoob ntiaj teb, mas muaj li ntawm 1,500 plhom leej uas raug teeb meem los ntawm tus kab mob Covid-19. Vim li ntawd, cov me nyuam uas nyob toj siab deb nroog thiab lawv niam lawv txiv yog neeg pluag txom nyem, mas lawv yuav tsis tau txais kev kawm txaus rau yav tom ntej. Tas cov me nyuam kawm ntawv nyob thoob ntiaj teb muaj 72 feem pua ntsib cov teeb meem no ib yam nkaus. 
Tam sim no muaj ntau lub teb chaws npaj siab rov qhib cov tsev kawm ntawv uas muaj kev tiv thaiv kab mob kom zoo, ces UNICEF thiaj thov kom cov tseem hwv muab siab rau ua cov hauj lwm ntawd kom tsis txhob sib tawg. Yog tias lub teb chaws twg tsis tuaj yeem yuav qhib cov tsev kawm ntawv tau, mas cov tseem hwv yuav tsum txhib cov xib hwb qhia ntawv nrhiav sij hawm los qhia pauj, kom cov me nyuam tau kev kawm ntawv xwm yeem. Tas txhua yam cov tseem hwv yuav tau xub xav tswv yim thiab xub npaj tseg hais txog kev kawm thiab cov teeb meem yuav tshwm sim yav tom ntej. 
Hnub tim 8 lub 9 hlis xyoo 1966, lub Koom Haum UNESCO tau muab hnub ntawd los ua hnub ntawm kev kawm ntawv nyob thoob ntiaj teb. Kom txhua lub teb chaws cov tseem hwv muab siab rau txog kev kawm ntawv thiab nthuav kev kawm ntawv kom dav tuaj. 
Xyoo 2020 no, UNESCO xav kom cov tsev kawm ntawv qhia txog kev tiv thaiv tus kab mob Covid-19 thiab lwm tus kab mob. Vim tus kab mob Covid-19 tau ua kev kub ntxhov rau kev lag luam thiab kev kawm ntawv nyob thoob ntiaj teb. Ua rau cov me nyuam txoj kev kawm tsis cuag ncua thiab tej tsev kawm ntawv raug kaw tseg. 
Thaum cov tsev kawm ntawv raug kaw tseg, mas tej me nyuam tsis tau kev kawm ntawv, ces lawv lub tswv yim yuav rov qab qeeb tuaj. Vim li ntawd, kev kawm ntawv nyob hauv lub caij tus kab mob Covid-19 sib kis, thiaj yog thawj yam teeb meem loj uas cov tseem hwv yuav tsum daws kho. Tus kab mob Covid-19 tshwm sim, mas nws qhia dab tsi rau peb ? Thiab peb tau txais kev kub ntxhov ntawm tus kab mob Covid-19 npaum li cas ? Tej yam no yog qhov tseem ceeb uas cov tseem hwv yuav tau muab siab rau tiv thaiv thiab daws kho, kom cov me nyuam thiaj yuav tau txais kev kawm ntxiv mus.