NTXHAIS HMOOB KAWM NTAWV TIAV VIM KEV TXHAWB NQA HAUV TXOJ KEV NTSEEG

Cov kwv tij Hmoob hauv lus zos Nab Khab tuaj nrog tus ntxhais Hmoob 'Thib' ua kev zoo siab rau nws txoj kev kawm.

Cheeb Koom Txoos ntsia pom tias yuav tsum tshaj Tswv Ntuj lub Moo Zoo mus rau cov haiv neeg me hauv lub Cheeb Koom Txoos, yog li lub Cheeb Koom Txoos thiaj txais cov me nyuam mus kawm ntawv nyob hauv cov tsev kawm ntawv hauv txoj kev ntseeg. Qhov no yog ib txoj kev tshaj lub Moo Zoo rau cov haiv neeg me; cov me nyuam yaus tau paub txog kev ntseeg Kav Tos Liv, cov niam txiv los tau pom txog txoj kev ntseeg kub siab pab lawv cov me nyuam.

Thib xeem Vaj los yog Porntip pichiannorakan yog ib tus ntxhais Hmoob tau txais kev pab hauv tsev kawm ntawv Kav Tos Liv, nws kawm ntawv tiav hauv lub tsev kawm ntawv qib siab Rajamangala University of Technology Pra Nakhorn. Nws kawm txog kev kav kiab kav khw (Marketing), nws yog tus ntxhais Hmoob xeem tau tim 1 hauv lawv cov tub hluas ntxhais hluas kawm kav kiab kawv khw.

Thip piav tias nws yug los nyob lub zos Nab Khab hauv xeev Phib Xas Nub Loj (Phisanulok), Thaib teb. Thaum nws txawm me me mas muaj ib tus Txiv Plig tuaj qhia kev ntseeg nyob hauv lub zos. Tus Txiv Plig ntawd hais tias kev kawm ntawv ua rau neeg txawj ntse thiab yuav coj kev vam meej tuaj rau lub neej, mas nws txiv thiaj tau xa nws mus kawm hauv cov tsev kawm ntawv Kav Tos Liv. Nyob hauv tsev kawm ntawv, mas cov Leej Choj thiab Leej Phauj tau qhuab qhia ntau yam rau nws; lawv pab nws tsis hais kev noj haus los yog nyiaj tsiag. Yog li nws thiaj rau siab kawm kom tiav.       

Thip piav txog nws kev kawm ntawv tias thaum nws txawm me mas nws kawm hauv zos tag ces ho mus kawm nyob hauv tsev kawm ntawv yawm vaj ‘Ratprachanukro 23 thiab hauv tsev kawm ntawv zos Khej Me. Thaum nws muaj 13 xyoos, Txiv Plig lawv thiaj xa nws mus kawm hauv tsev kawm ntawv Sacred Heart Pattanaves School thiab Phraharuthai Donmuang School.

Nws hais tias kev kawm ntawv tsis muaj qhov yooj yim los tsis yooj yim; yog yus rau siab thiab kub siab tiag.

Hais txog ntawm nws txoj kev xav rau cov tsev kawm ntawv Kav Tos Liv, mas nws hais tias cov tsev kawm ntawv Kav Tos Liv ces zoo li yog yus lub tsev tim ob, vim muaj cov Leej Choj thiab Leej Phauj saib xyuas yus xws li yog yus niam yus txiv, muaj cov phooj ywg zoo li yog yus cov kwv tij. Tsev kawm ntawv thiaj zoo li lub tsev loj uas muaj cov neeg sib nyiam sib hlub nyob ua ke.

Tsis tas li xwb tsev kawm ntawv Kav Tos Liv txawm pab qhia kev ntseeg, qhia nyeem Ntawv Ntshiab; yog li cov kawm ntawv hauv tsev kawm ntawv Kav Tos Liv thiaj muaj kev ntseeg ruaj khov. Thaum muaj kev ntseeg lawm ces yuav tsis ntshai dab tsi.

Txawm li cas los xij, lus txhawb siab ntawm yus niam txiv tiag tiag mas yog ib yam tshuaj tseem ceeb nyob hauv txoj kev kawm deb vaj deb tsev. Vim kev kawm hauv tsev kawm ntawv Kav Tos Liv, mas yuav mus nyob txawv zos, txawv neeg; mas tej zaug ua rau yus kho kho siab thiab.

Hais txog kev kawm tiav nyob hauv tsev kawm ntawv txheeb siab zaum no, mas Thib hais tias nws zoo siab kawg uas xeem tau tim ib, nws yuav muab qhov paj tshab no pub rau txhua tus uas pab txhawb nws txoj kev kawm. Thib hais ntxiv tias kev xeem tau tim ib, mas yog qhia txog nws txoj kev rau siab thiab kub siab kawm ntawv; yog li nws thiaj xav kom cov kwv tij Hmoob uas tab tom kawm ntawv saib nws ua piv txwv kom lawv kawm tiav li nws.

Thib hais tias kev kawm tsis yog ua rau muaj nyiaj tsiag, tab sis yog kom txawj ntse. Kev txawj ntse yog yam nrog yus nyob mus ib txhi, kev txawj ntse yog yam yuav muab qhia rau lwm tus tau.

Nws hais tias tej zaum nws yuav qhia tus ub tus no kom ua li ub li no thiaj kawm ntawv tias li nws tsis tau, tab sis nws yuav ua ib tug qauv zoo rau cov ntxhais Hmoob hauv zos pom tias nws ua zoo li cas thiaj los txog qhov no. nws mam pab txhawb dag zog rau lawv Yog lawv rau siab ces muaj ib hnub yuav yog lawv li xwb. Thov kom lawv rau siab thiab kub siab.

Thib hais tias yog leej twg tsis muaj nyiaj tab sis xav kawm ntawv no los, ho mus nrog cov tsev kawm ntawv Kav Tos Liv sib tham, vim tsev kawm ntawv Kav Tos Liv zoo siab txhawb nqa txoj kev kawm rau sawv daws.

Add new comment

4 + 11 =