KAWM KHO KEV TXIJ NKAWM.

Pab pawg txhawb nqa txij nkawm hauv zos Khej Me tsa rooj kawm kho kev txij nkawm phaum 75 uas yog ib lub rooj kev kawm zwm rau Cheeb Koom Txoos Nas Qhoos Xas Vaav (Nakhornsawan Diocese) 
Rooj kawm kho kev txij nkawm no yog cov ntseeg Kav Tos Liv nyob Thaib teb ib txoj hauj lwm uas txhim tsa puag thaum xyoo 1985 los lawm, muaj Txiv Plig Zam Us Lis As Nas (Fr. John Ulliana) Leej Choj hauv koom haum cog lus Xas Les Xias ua tus pub lub tswv yim rau tsoom ntseeg hauv tsev teev Ntuj hwm Leej Ntshiab Yos Xes hauv Npaaj Poom, xeev Laj Npos Lis, kom lawv ua raws lub Koom Txoos cov lus qhia hais txog daws kho thiab txhawb nqa kev sib haum xeeb hauv cuab yim neej. 
Thaum ntawd mas Txiv Plig Us Lis As Nas ntsia pom tias cov me nyuam yaus tuaj kawm ntawv hauv tsev kawm ntawv mas lawv coj tus cuj pwm zoo, tiam sis txog cai so ntawv, lawv mus tsev rov tuaj mas lawv tus cuj pwm txawv qhov qub. Cov me nyuam ntawd coj tus cuj pwm phem, tsis mloog lus thiab tsis xyaum ua neeg zoo.
Txiv Plig xav tias tej zaud mas teeb meem tsis yog los ntawm cov me nyuam yaus, tiam sis yog los ntawm cov niam txiv coj tus yam ntxwv tsis zoorau tej me nyuam pom. Li ntawd, Txiv Plig Us Lis As Nas thiaj hais kom cov ntseeg sim tsa rooj kawm los txhim kho lub cuab lub yig kom lawv muaj kev sib haum xeeb thiab coj tus yam ntxwv zoo. Tom qab cov me nyuam mus tsev rov tuaj mas lawv ua neeg zoo, tsis muaj tus cuj pwm phem raws li Txiv Plig Us Lis As Nas xav.
Txij ntawd los, cov ntseeg thiaj sib sau ua pab pawg txhawb nqa txij nkawm los qhuab qhia kev kawm kho txij nkawm.
Lub rooj kawm no maj mam loj hlob thiab ri mus txhua lub Cheeb Koom Txoos nyob Thaib teb.
Rooj kho kev txij nkawm phaum 75 zaum no yog tsa nyob hauv lub tsev teev Ntuj hwm Leej Niam Pab Neeg hauv zos Khej Me rau hnub tim 28-30 lub 8 hli dhau los no, muaj cov niam txiv tuaj koom tag nrho yog 11 nkawm; muaj 3 nkawm yog cov ntseeg Kav Tos Liv thiab 8 nkawm yog cov coj qub kev cai. Lawv puav leej yog haiv neeg Hmoob nyob ib ncig ntawm lub zos Khej Me, xeev Pheb Tshas Npoos.