LUB LEEJ HAUM KUJ NRHIAV KEV DAWS TEEB MEEM KOOJ TXOM FAV

Lub Leej Haum Kuj FAO thov kom cov kuj cuab sib koom tes pab daws teeb meem kev kub ntxhov hais txog kooj txom fav nyob As Fiv Kas sab hnub tuaj. Lub Leej Haum Kuj tau teeb tus peev nyiaj txiag hais txog kev pab daws teeb meem zaum no yog 70 plhom US dos las. Teeb meem kooj txom fav, yog ib yam teeb meem loj kawg. Vim tias kooj txom fav tau muab tsoom pej xeem tej qoob loo noj tag. Cov kooj txom fav no yog ya los ntawm Es Thias Pias teb (Ethoipia) thiab Xos Mas Lis teb los. Tam sim no kooj txom fav tab tom ua teeb meem loj nyob Kees Yas teb (Kenya). 
Us Nkas Ntas teb (Uganda) thiab Xus Das Naj (North Sudan) 2 lub teb chaw no raug kev tshaib nqhis, yog vim tsov rog thiab kooj txom fav xwb. Kooj txom fav nyob Kees Yas teb, mas ua teeb meem loj kawg nyob hauv 70 xyoo dhau los. Hos nyob Es Thias Pias teb thiab Xos Mas Lis teb, mas yog teeb meem loj nyob hauv 25 xyoos. FAO ceeb toom tias : lub 11 hlis xyoo no, Es Thias Pias teb yuav raug teeb meem loj. Yog tias cov tseem hwv nyob As Fiv Kas sab hnub tuaj tsis muab siab rau tua cov kooj txom fav, mas kooj txom fav yuav coob dua qub tuaj li ntawm 500 npaug nyob hauv lub 6 hli. Vim li no FAO thiaj pom tias kooj txom fav yog ib yam teeb meem loj ntawm kev tshaib nqhis nyob tas xeeb ntuj As Fiv Kas. Cov tseem hwv Us Nkas Ntas hais tias : cov kooj txom fav coob coob li no, yog los ntawm tsaib no ntuj tsis los nag nyob hauv cov thaj tsam muaj kooj, ces kooj thiaj zoo nteg qe daug me nyuam. Feem ntau kooj nyiam nyob thiab ya ib leeg twm zeej, tab sis muaj qee zaus kooj yuav sib sau nyob ua ke coob thiab ya nrhiav noj, ces ua rau kooj cov tsos hloov thiab. Cov kooj txom fav nyob thoob xeev ntuj As Fiv Kas sab hnub tuaj, mas yog tsos paj yeeb. Tos muaj kooj txom fav coob coob nyob thoob xeev ntuj As Fiv Kas, kuj yog vim Kees Yas teb nyob npuas Xos Mas Lis teb qhov uas muaj kooj coob coob. Yog sawv daws tsis sib pab tiv thaiv, mas xav tias yuav muaj tej npoj kooj txom fav ya mus rau As Fiv Kas sab hnub poob thiab mus txog xib fab naj nyob Us Nkas Ntas teb.
FAO hais tias txhua txhua hnub, mas ib tug kooj hnyav li cas, nws tsuas noj li qhov nws hnyav xwb. Yog tias muaj kooj coob npaum li lub tuam ceeb Pas Lis, mas ib hnub kooj yuav noj 50 feem pua ntawm tib neeg cov txhiam xws nyob thoob Fab Kis teb. Nyob Khis Tus Is (Kotui) thiab Mus Xas Yas (Musya), tsoom pej xeem Kes Nias uas lawv yog neeg liaj neeg teb hais tias : txhua txhua hnub thaum yuav tsaus ntuj, mas lawv yuav tsum lawv caum kom kooj ya tawm ntawm lawv daim teb mus. Lawv ua li ntawd txhua hnub, los tsis tuaj yeem yuav pab tau lawv tej qoob loo. Niaj hnub lawv ntaus nruas caum kooj thiab vam tias qhov lawv ua ntawd yuav pab tau lawv. Tab sis kooj ya tawm hauv lawv daim teb mus lawm, mas kooj kuj mus tsaws rau lwm daim teb uas tsis ntaus nruas lawv kooj thiab. 
Tus txhais : Lis Maib, Zoo Tswv Zov Yaj