LUB NROOG LONDON TAB TOM YUAV RAIS LOS UA THAWJ LUB NROOG HAV ZOOV NYOB NTIAJ TEB NO.

Lub tuam ceeb London xav txhim kho kom tau ua ib lub nroog hav zoov uas muaj xyoob ntoo nroj tsuag nyob puv lub nroog, hu ua National Park City uas yog thawj lub nroog ntsuab xiab nyob ntiaj teb no. Kom tsoom pej xeem tau pom txog qhov tseem ceeb ntawm xyoob ntoo thiab nrog tsuag nrog rau txhua hom tsiaj txhu nyob hauv lub nroog. Vim yog xav ua kom txhua yam tiav raws lub hom phiaj, mas lub tuam ceeb London thiaj yuav ua kom 50 feem pua hauv lub nroog ntsuab xiab rau xyoo 2050. Cov tseem hwv tau thov kom tsoom pej xeem nyob hauv tuam ceeb London hloov lawv tej chaw uas yog av kom muaj nroj ntsuab xiab, yam li tej tog vaj tog tsev, saum ru tsev thiab hauv tej vaj kom sawv daws cog nyom thiab cog xyoob ntoo. Khawb qhov ncig laj kab kom tej tsiag tau kev nkag mus los yooj yim, xws li tsaug thiab nas kos. Tseem hwv tau siv peev nyiaj txiag 12 plhom PON los faib rau tsoom pej xeem nyob thoob tuam ceeb London, kom sawv daws tau siv cov nyiaj ntawd los cog xyoob cog ntoo thiab ntxiv hav zoov. Tseem hwv vam tias 1 PON nyiaj yuav pab txuag tau tseem hwv cov nyiaj pab tsoom pej xeem nyob hauv tuam ceeb London li ntawm 7 PON. Vim niaj xyoo cov tseem hwv Aas Kiv tau siv nyiaj ntau kawg los saib xyuas xyoob ntoo thiab saib xyuas tsoom pej xeem kev noj qab haus huv. Cov kws txuj nyob Aas Kiv teb hais tias : kev cog xyoob ntoo kom ntsuab xiab tuaj, mas pab kom tsoom pej xeem txhob rog rog, tsis muaj kev npau taws thiab huab cua zoo tuaj. Tsis tas li ntawd, kuj yuav pab kom cov neeg nyob hauv tuam ceeb London lub hnub nyoog ntev dua qub thiab. Tam sim no lub tuam ceeb London kuj yog ib lub nroog uas muaj xyoob ntoo ntsuab xiab nyob hauv cov nroog loj uas muaj xyoo ntoo. Lub tuam ceeb London cov thaj tsam uas muaj xyoob ntoo ntsuab xiab yog 1 feem 3. Hos lub nroog Pas Lis thiab New York muaj xyoob ntoo ntsuab xiab yog 10 feem pua thiab 27 feem puab xwb.
Txawm li cas kuj xij, hais txog kev cog xyoob ntoo kom lub nroog ntsuab xiab ntawm cov tseem hwv Aas Kiv, mas yeej paub tias tsoom pej xeem yuav coob ntxiv li ntawm 2 plhom leej nyob hauv xyoo 2040. Tam sim lub tuam ceeb London muaj neeg nyob coob li ntawm 9 plhom leej. Ces neeg thiab vaj tsev yuav coob thiab ntau dua zim txwv no. Tam sim no cov Koom Haum txhim vaj tse tab tom nrhiav lub tswv yim tshiab los txhim cov tsev tshiab uas tsis siv chaw dav dav, thiab lawv vam tias lawv yuav nrhiav tau lub tswv yim txhim tsev tshiab sai sai no rau sawv daws tau siv. Tsis tas li ntawd, sawv daws yuav cog zaub saum ru tsev, cog hmab nce phab ntsa thiab tej tsav lawj kom pab nqus cov huab cua tsis zoo thiab ntis tshav ntuj. Yog ua li no, mas sawv daws tej vaj tsev yuav txias thiab tsis siv ntsuab tsis siv roj lawm. Yuav ua kom tej av noo thiab nroj tsuag ntsuab xiab thawm xyoo. Kuj yuav ua rau me kab me muv thiab tej nas noog khiav los nyob hauv nroog. Lub tuam ceeb London tsis yog 9 plhom tus neeg qhov chaw nyob xwb, tseem muaj tshaj 15,000 hom nroj tsuag nyob sib xyaws thiab. Zoo yam li neeg nyob xyaw txhua hom nroj tsuag. Lub tuam ceeb London thiab Aas Kiv teb muab siab rau txhim kho kom muaj nroj tsuag ntsuab xiab tuaj tiag. Aas Kiv teb kuj yog thawj lub teb chaws uas tshaj tias lub ntuj kub yog teeb meem loj rau neeg. Lub tuam ceeb London yuav pib nqis tes ua cov hauj lwm no txij lub 7 hli xyoo no mus.

Tus txhais : Lis Maib, Zoo Tswv Zov Yaj