ROJ NCHUAV NYOB MOS LIS XIAS TEB.

Mos Lis Xias yog ib lub teb chaws pov txwv nyob hauv As Fiv Kas teb, thiab nyob toob fab naj ntawm lub hiav txwv Is Ntias.
Hnub tim 6 lub 8 hli no, muaj ib lub nkoj Zis Pees hu ua Vas Kas Sis Os (Wakashio) thauj roj mus ze ntug hiav txwv ntawm Mos Lis Xias teb, ces lub qab nkoj mus tsoo qab thus dej, ua rau lub nkoj lov ua 2 ya. Cov roj nchuav ntws xyaw dej hiav txwv ntau kawg. Cov teeb meem ntawd ua kev kub ntxhov rau cov teb chaws nyob hauv lub hiav txwv Is Ntias txoj kev ncig tsham teb chaws thiab tej ntses tej vaub kib nyob hauv hiav txwv. Vim cov roj ntawd yog ib co roj dub dub nyeem nyeem thiab cov roj uas nchuav ntawd muaj li ntawm 1,000 tons. Cov tseem hwv Mos Lis Xias thiaj ceeb toom kom tsoom pej xeem thiab lwm cov nkoj tsis txhob mus ze thaj tsam ntawd. Tus thawj coj ntawm lub Koom Haum Mitsui O.S.K Line tawm los hais ib co lus thov txim thiab tu siab txog cov teeb meem uas tshwm sim zaum no. Yuav ua kom cov roj no ploj mus thiab ua kom txhua yam rov zoo tuaj, mas yuav tsum siv sij hawm ntau lub hlis.