Cov kev teev hawm cog lus sib koom nyob hauv cov teb chaws uas kev ntseeg muaj ntau yam sib txawv nyob thoob ntiaj teb

Nyob As Xias toob fab naj hauv teb chaws Xees Cas Pos muaj cov tsev teev hawm sib txawv los ntau caum xyoo lawm. Cov tsev teev hawm Phus Thas xws li Suav cov, cov tsev teev Ntuj thiab Sathya Sai Baba Center muaj nyob ntawm ntug kev Moulmein, nyob Xees Cas Pos teb. Vim Xees Cas Pos teb yog lub teb chaws uas muaj cov tsev teev hawm sib txawv ntau tshaj plaws nyob hauv ntiaj teb no, raws li Pew Research Center soj ntsuam nyob hauv xyoo 2014.

Cov nroog nyob As Xias toob fab naj, muaj kev sib koom tes hais txog kev teev hawm los ntau caum xyoo, ces ua tsaug rau cov thawj coj hauv txhua txoj kev teev hawm, cov tseem hwv thiab txhua fab hauj lwm ntawm tsoom pej xeem. Lub Koom Haum ntawm kev teev hawm nyob Xees Cas Pos teb, pib txhim tsa nyob hauv xyoo 1949, yog los ntawm kev sib koom tes ntawm cov thawj coj hauv kev teev hawm.

Xyoo 1990 txoj cai hais txog kev sib koom tes thiab sib haum xeeb ntawm cov kev teev hawm thiaj raug tshaj tawm kom sib pab txuag thiab sib haum xeeb zoo ntawm cov kev teev hawm. Tsis hais kev teev hawm Baha'i, Buddhism, Christianity, Hinduism, Jainism, Judaism, Muslims, Taoism, Sikhs thiab Zoroastrianism puav leej yog cov muaj neeg ntseeg coob nyob cov xeev uas muaj neeg nyob li ntawm 5.45 plhom leej. Raws kev soj ntsuam ntawm tseem hwv Xees Cas Pos, cov neeg muaj hnub nyoog 15 xyoos rov saud nyob hauv xyoo 2020, mas 31.1 feem pua yog Buddhism, 8.8 feem pua yog Taoism, 18.9 feem pua yog Christianity, 15.6 feem pua yog Muslims thiab 5 feem pua yog Hinduism. Dua li lwm cov kev teev hawm mas yog 0.6 feem pua thiab cov tsis muaj kev teev hawm dab tsi kiag li yog 20 feem pua.

Tam sim no cov Kav Tos Liv yog 6.6 feem pua ntawm tas tsoom pej xeem nyob As Xias toob fab naj.