COV ME NYUAM NYOB AWS LOS PAS LUB NEEJ

5 xyoos tag los muaj ib lub nkoj nchuav nyob hauv hiav txwv lub caij thauj ib co neeg ua thoj nam khiav mus rau Aws Los Pas. Alan Kurdi uas nws muaj hnub nyoog 3 xyoos, yog ib tug me nyuam uas tuag nyob hauv lub nkoj nchuav tawd. Cov xwm no ncha mus thoob ntiaj teb hais txog cov neeg thoj nam. Txhua yam muaj sau cim tseg nyob hauv Save the Children Italy phau ntawv thiab hais txog 5 yam teeb meem loj, xws li cov teb chaws Aws Los Pas tiv thaiv ciam teb, kev txwv tsis pub neeg nkag teb chaws, kev nkag mus txog cov neeg thoj nam, kev sib sau ntawm cov yim neeg thiab kev saib xyuas cov neeg thoj nam. Raws kev soj ntsuam mas pom tau tias cov me nyuam yaus uas raug niam txiv coj khiav ua neeg thoj nam mus rau Aws Los Pas, feem coob yog tuaj ntawm Es Thias Pias teb, As Kas Nis Taas teb, Xis Lias teb, Zes Mas Nias teb, Hes Laas teb, Is Tas Lias teb thiab Xws Ves Lis teb. Cov neeg thoj nam no, muaj ib txhia tau kev tos txais zoo thiab muaj tej lub Koom Haum saib xyuas lawv. Tab sis kuj muaj ib txhia uas tsis muaj neeg tos txais lawv, lawv tsis tau zoo chaw nyob thiab lawv nyiag kev nyob ntshai rwg. Txoj kev ntshai ntawd, yog ntshai tsam lawv raug ntes xa rov qab mus lawv teb chaws, thiab ntshai tsam tsis tau nrog lawv cov tsev neeg nyob ua ke. Alan Kurdi txoj kev tuag, mas ua rau lub Koom Haum Aws Los Pas nco ras thiab nrhiav kev daws teeb meem kev kub ntxhov ntawm cov neeg thoj nam. Tsis tas li ntawd, lub Koom Haum Aws Los Pas kuj muaj tej txoj cai tshiab thiab, tab sis ua tsis tau hauj lwm zoo pes tsawg. Xyoo 2016, cov teb chaws Aws Los Pas thiab Tws Kis teb sib koom tes txhawb nqa kom cov neeg thoj nam tsawg zuj zus, thiab ua kom cov neeg thoj nam uas khiav mus rau Aws Los Pas haum txoj cai zuj zus. Tab sis Save the Children hais tias tseem muaj cov neeg thoj nam coob kawg uas feem coob yog cov me nyuam haus raug khuam nyob hauv cov pov txwv Hes Laas yav txom nyem ntsuav. Xyoo 2020, tseem muaj cov tub ntxhias hluas khiav twm zeej mus rau Is Tas Lias teb coob kawg. Thiab pom tau tias cov neeg thoj nam uas khiav hla lub hiav txwv As Fiv Kas qaum teb tseem muaj coob tas nrho. Ces thiaj muaj cov me nyuam poob dej tuag coob coob los ntawm cov teb chaws Aws Los Pas txoj kev tiv thaiv cov neeg thoj nam.