COV NEEG COG QOOB LOO NYOB LOS TSUAS LUB NEEJ HLOOV LAWM

Ntawv xov xwm tshaj tias tsoom pej xeem Los Tsuas tso lawv tej liaj teb tseg, vim lawv xav mus nrhiav lub neej zoo dua nyob hauv nroog. Cov av uas tsoom pej xeem siv los ua liaj ua teb thiab raug lawv muab tso pov tseg ntau kawg. Tsoom pej xeem ua liaj ua teb feem coob lawv tej qoob loo poob nqis thiab nyob deb nroog, ces ua rau lawv txoj kev cog qoob loo qaug zog. Tau 2-3 xyoos dhau los no, tsoom pej xeem tej liaj teb kuj raug tseem hwv txeeb mus txhim tej yam tshiab. Ces tsoom pej xeem Los Tsuas ntau txhiab leej thiaj khiav ua thoj nam mus rau Thaib teb. Lawv mus nrhiav hauj lwm ua tu vaj tu tsev thiab raug quab yuam ua hauj lwm hnyav.

10 tawm xyoo dhau los no, tsoom pej xeem Los Tsuas 77 feem pua ntawm tas tsoom pej xeem 7 plhom leej, lawv yog cov neeg ua liaj ua teb. Xav tias 10 xyoo tom ntej no, ntshe tus zauv ntawm tsoom pej xeem ua liaj ua teb tseem yuav qis dua no.

Txawm li cas kuj xij, yog vim tsoom pej xeem tsis muaj kev kawm txaus thiab kev txawj ntse qis, ces lawv tsis tuaj yeem yuav nrhiav tau tej txoj hauj lwm zoo ua, cov ntxhais Los Tsuas ib txhia thiaj raug mus ua niam ntiav nyob Suav teb thiab Thaib teb.

Tsoom pej xeem Los Tsuas uas yog neeg liaj neeg teb, ntau txhiab leej thiaj khiav mus nrhiav ua hauj lwm ua nyob Thaib teb, tab sis lawv tsuas yog tau tej txoj hauj lwm ua xws li tu vaj tu tsev thiab ua tus kav cov tub zog ua hauj lwm, tab sis yog tej txoj hauj lwm uas hnyav thiab raug quab yuam heev kawg. Tab txawm tias kev ua hauj lwm nyob txawv teb chaws raug quab yuam thiab hnyav npaum li cas, tsis kav zoo dua lawv nyob hauv lawv lub teb chaws.