Cov neeg laus nyob Nyab Laj teb tiv kev txom nyem thiab nyob ib leeg yam tsis tu ncua

17 feem pua ntawm cov neeg laus uas hnub nyoog 60 rov saud coob leej, lawv tsis muaj nyiaj laus yug nyob hauv niaj lub hlis. Duong Thi Gio uas nws yog ib tug neeg liaj neeg teb tsis muaj nyiaj hli khaws tseg rau yav laus, nws nrog nws tus tub nyob deb deb nroog thiab ib hlis tsuas khwv tau nyiaj li 1 plhom Doos xwb, yam li yog 42 dos las. Qhov nyiaj no tsis txaus noj haus thiab tsis txaus them nqi tshuaj. Vim li ntawd, nws yuav tsum mus thov mov noj ntawm luag tej.

Duong Thi Gio yog ib tug poj ntsuam, nws hnub nyoog muaj 71 xyoos. Nws nyob hauv lub nroog Hai Lang, lub xeev Quang Tri, nws hais tias : xyoo 2018 uas nws muab nws lub tsev muag tas, mas nws tsis muaj tsev nyob. Nws khiav mus nrog nws tus tub thiab tus nyab nyob hauv lub xeev Binh Duong uas nyob qab teb.

Nws raug ua hauj lwm hauv vaj hauv tsev thiab saib xyuas nws 2 tug xeeb ntxwv ntau xyoo. Ces qhov kawg nws mob pob qij txha ntawm hauv caug, nws tsis muaj zog thiab tsis tuaj yeem tiv thaiv tau. Nws tus nyab thiaj yuav tsum ntiav ib tug los neeg tu nws. Nws hais tias nws nyob txom nyem ntsuav, ces tsaib no nws thiaj txiav txim siab rov mus nws qub zog thiab ua ib lub me nyuam tsev me me xws lub tsev teb rau nws nyob. 

Raws kev soj ntsuam nyob Nyab Laj teb hauv xyoo 2019, mas pom tau tias Nyab Laj teb muaj cov neeg laus 11 plhom 400 txhiab leej, muab xam ua 12 feem pua ntawm tas tsoom pej xeem Nyab Laj.

Nyob hauv lawv cov neeg laus, 64 feem pua tsis muaj nyiaj so laus noj los yog kev pab ntawm tseem hwv. Lawv tsuas vam txog tej neeg txheeb ze pab thiab lawv ua hauj lwm yug tus kheej xwb. Muaj coob leej nyob qis tshaj ntawm txoj kab cov neeg pluag hauv lub teb chaws, qhov ntawd txhais tias cov nyiaj lawv khwv tau nyob hauv niaj lub hlis mas tsis txog 50 US dos las. Nyab Laj teb yog ib lub teb chaws uas muaj cov neeg 60 xyoo rov saud coob zuj zus sai kawg nyob hauv 4 xyoo dhau los. Ces xav tias thaum txog xyoo 2030 cov neeg laus yuav nce siab txog li 12 feem pua thiab 25 feem pua nyob hauv xyoo 2050. Tab sis nyob hauv lub 2 hlis xyoo 2023 no, cov neeg laus muaj coob li ntawm 16 plhom tawm leej, los yog 17 feem pua ntawm tas tsoom pej xeem Nyab Laj.

Cov neeg laus uas tsis muaj nyiaj so laus noj, tsis yog tias lawv txom nyem thiab nyob ib leeg xwb, lawv tseem ua ib lub nra hnyav rau tej txheeb ze thiab. 

Dao uas nws tsev neeg muaj 5 leeg, lawv nyob hauv ib lub tsev dav 40 mev, nws hais tias lawv tsev neeg kev khwv nyiaj poob qis heev txij thaum nws tawm hauv lub tsev xaws khaub ncaws los. Vim nws yuav tsum tau los saib xyuas thiab tu nws txiv uas muaj tus kab mob raws plab txij thaum lub caij nplooj ntoos zeeg tsaib no los lawm. Nws hais tias lawv tsis muaj nyiaj yuav xa nws txiv mus nyob hauv tsev laus, los yog ntiav neeg los pab tu. Vim yuav tsum siv nyiaj ib lub hlis li ntawm 7-10 plhom Doos, ces lawv tsis muaj nyiaj txaus.